Эдэр ыччакка аналлаах өрөспүүбүлүкэтээҕи «МУУС УСТАР» бэстибээл быйыл үбүлүөйдээх 5-с төгүлүн ыытыллар. Сунтаарбыт улууһуттан өрөспүүбүлүкэтээҕи бэстибээлгэ кыттар сүүмэрдиир түһүмэҕэ олунньу 1 күнүттэн кулун тутар 11 күнүгэр диэри ыытылынна. Сүүмэрдиир этапка 14 хайысхаҕа, уопсайа 300-тэн тахса киһи кытынна. Олортон 64 бастыҥ ыччат Дьокуускай куоракка ыытыллар «МУУС УСТАР-2025» бэстибээл түмүктүүр этапыгар кытта барар.
Ол курдук, «Воплощай и вдохновляй» хайысхаҕа «Күн» үҥкүү күрэһигэр «Түһүлгэ» норуот фольклорнай кэлэктиибэ, «Сулустар» ырыа күрэһигэр Сунтаардааҕы гимназия учуутала Тимур Тихонов кыттыахтара. «Время традиций» диэн Саха сирин норуоттарын үгэстэрин, сиэрдэрин-туомнарын уонна култуураларын билиигэ күөн күрэс сүүмэрдиир түһүмэҕэр «Герои нашей истории: 80 лет Победы» эссэ күрэһигэр Арыылаах орто оскуолатын учуутала Станислав Ноговицын, «Я-Россиянин» диэн КВИЗ күрэскэ Сунтаардааҕы иккис нүөмэрдээх оскуола учуутала Сардаана Афанасьева уонна «ЭтноБлог в ТОПе» медиакуонкуруска Сунтаардааҕы алын сүһүөх оскуолатын учуутала Семен Федоров кыттыахтара. «Архитон» күрэс хамаандатыгар Сунтаардааҕы политехническай лиссиэй-интэринээт үөрэнээччитэ Нина Захарова, ХИФУ Инженернай-техническэй институтун архитектура уонна куорат тутуутун кафедратын устудьуоннара Диана Николаева, Игорь Петров киирдилэр. «Креасфера+» диэн цифровой худуоһунньуктар күрэстэригэр искусство оскуолатын үөрэнээччитэ Валерия Федорова, эбии үөрэхтээһин педагога Варвара Иванова кыттыахтара, «Секреты шефа» ас астааһын күрэһигэр Сунтаардааҕы технологическай колледж устудьуона Евгения Слюсарь, эдэр наставниктар «Вдохновляи на успех» күрэскэ «Ньургуһун» уһуйаан сэбиэдиссэ¬йин солбуиааччы Мария Владимирова, «Туристический код моего района» треккэ Айылтаана Егорова, Татьяна Васильева сүүмэрдээһини аастылар. «Добровольчество» бириэмийиэҕэ КСВО «Харысхал» киирсиэҕэ.
Ону сэргэ, кулун тутар 11 күнүгэр Сунтаар улууһун баһылыга Анатолий Григорьев «МУУС УСТАР» бэстибээл өрөспүүбүлүкэтээҕи этапыгар кытта барар кыттааччылары кытта көрсүстэ. Анатолий Григорьев улууспут эдэр ыччата олус актыыбынайын сэргээтэ уонна бэстибээлгэ ситиһиилээхтик кыттан кэлэллэрин баҕарда.
Дмитрий ЫМЫЧАНОВ