Төрөөбүт дойду, төрөөбүт төрүт буор хас биирдии киһиэхэ ураты, дьикти иэйиини аҕалар сүдү күүстээх.
Балаҕан ыйын 21 күнэ – Сунтаар улууһун төрүттэммит күнүнэн ааҕыллан, сыл ахсын өрө көтөҕүллүүлээхтик бэлиэтиир үтүө үгэстээхпит. Маннык үтүөкэн, өрөгөйдөөх күнүнэн бар дьоммутун итиитик-истиҥник эҕэрдэлиибит!
Дьоһун-мааны дьонноох-сэргэлээх, олоҥхо дойдутугар тэҥнээх Аар айылҕалаах тапталлаах Сунтаарбыт чэчирии сайдарын, күнтэн күн тупсарын туһугар бука бары биир сомоҕо буолан күргүөмнээх үлэ барар. Быйыл даҕаны бииртэн биир ситиһиилэр кэлэ тураллар, үйэлээх үлэлэр ыытыллаллар. Бу бэлиэ күн биир сомоҕобутун, улууспут историятын, инникигэ эрэлбитин, төрөөбүт дойдубут сайдыытын кэрэһэлиир.
Сунтаарбыт улууһа өрөспүүбүлүкэ уопсай тэтимнээх сайдыытыгар бэйэтин кылаатын киллэрэ олорор. Тыа сирин тупсаҕай оҥоруу, олох-дьаһах хомунаалынай өҥөтүнэн сөптөөхтүк хааччыйыы, нэһилиэнньэ доруобуйатын туруга, ыччат үөрэҕи ылыыта, култуура төрүт үгэстэрин чөл хаалларыы, онтон да элбэх тыын суолталаах боппуруостарга сөптөөх үлэлэр бара тураллар. Бу барыта – биһиги түмсүүлээх үлэбит түмүгэ!
Күндү биир дойдулаахтарбытын өссө төгүл Сунтаарбыт улууһа төрүттэммитэ 223 сылынан эҕэрдэлиибит! Инникитин даҕаны сайдыы суолун тутуһан эрэллээхтик хардыылыах! Дойдубутун таптыах, ытыктыах, кини аатын аар-саарга ааттатыах!!!
Анатолий Григорьев, «Сунтаар улууһа (оройуона)»
муниципальнай оройуон баһылыга,
Ульяна Попова,
улуус дьокутааттарын сэбиэтин бэрэсэдээтэлэ.