Тыа хаһаайыстыбатын уонна ас-үөл бэлиитикэтин министиэристибэтэ атырдьах ыйын 15 күнүттэн Степан Максимович Аржаков аатынан Судаарыстыбаннай бириэмийэҕэ тыа хаһаайыстыбатын салаатыгар таһаарыылаахтык үлэлии сылдьар тэрилтэлэртэн хандьыдааттар докумуоннарын тутан саҕалыа.
С.М.Аржаков аатынан Судаарыстыбаннай бириэмийэ биирдиилээн дьоҥҥо эбэтэр кэлэктиипкэ тыа хаһаайыстыбатын сайдыытыгар киллэрбит кылаатын, үлэһит идэтигэр маастарыстыбатын, ситиһиилэрин, көрдөрүүлэрин түмүктэринэн ананар. Биир тэрилтэ үстэн элбэҕэ суох таһаарыылаах үлэлээх хандьыдааты туруоруон сөп. СӨ бу Судаарыстыбаннай бириэмийэтин лауреата 500 тыһ. солк. харчынан наҕараадаланыа. Оттон лауреат аатын ылбыт кэлэктиип хас биирдии чилиэнэ дипломунан, түөскэ кэтэр анал бэлиэнэн, ону таһынан бэриллибит харчынан бириэмийэни төһө кыттааччылааҕынан көрөн үллэстиэ.
Докумуоннары тутуу атырдьах ыйын 15 күнүттэн балаҕан ыйын 16 күнүгэр диэри, Тыа хаһаайыстыбатын министиэристибэтигэр: Дьокуускай к., Курашов уул. 28, 301 кэб., төл: (4112)506663, электроннай почта: minselhoz@sakha.gov.ru үлэ күннэригэр 9:00 чаастан 18:00 ч диэри (эбиэт кэмэ 12:30-14:00).
Санатар буоллахха, бу судаарыстыбаннай бириэмийэ СӨ Ил Дарханын Тыа хаһаайыстыбатын үлэһитин күнүн көрсө 2015 с. балаҕан ыйын 8 күнүнээҕи Ыйааҕынан ылыныллыбыта. Наҕараадаҕа СӨ биллэр судаарыстыбаннай уонна политическай диэйэтэлэ Степан Максимович Аржаков аата иҥэриллибитэ.