Бэс ыйын 6-10 күннэригэр Дьокуускайга уонна Бэрдьигэстээххэ Саха Өрөспүүбүлүкэтин үөрэнээччилэрин сайыҥҥы иккис спартакиадаларын бүтэһик быһаарыылаах күрэхтэһиитэ буолар.
Манна санатан ааһар буоллахха, үөрэнээччилэр спартакиадалара 1994 сылтан саҕаламмыта. Оттон кылгас кэмҥэ тохтоон баран, былырыыҥҥыттан Ил Дархан Айсен Николаев дьаһалынан сөргүтүллэн, «Спортивные якутяне» диэн ааттанан иккис спартакиада бэҕэһээ үөрүүлээх аһыллыыта буолбута. Успуорт 9 көрүҥэр (бокса, волейбол, көҥүл тустуу, гиирэ, чэпчэки атлетика, мас тардыһыыта, саахымат, дуобат, оҕунан ытыы) өрөспүүбүлүкэ бары улуустарыттан эдэр спортсменнар күөн көрсүһүүлэрэ бүгүн сарсыардаттан саҕаланна.
Спартакиада түмүгүнэн бастаабыт хамаанда – 250, иккистээбит хамаанда – 150 уонна үһүс миэстэлээх хамаанда – 100 тыһ. солк. харчынан наҕарааланыахтара.
“Спартакиадаҕа икки көрүҥ эбиллэн биэрдэ: гиирэ успуорда уонна доруобуйаларынан хааччахтаах оҕолорго чэпчэки атлетика. Маны таһынан, Ил Дархан Айсен Николаев быһаарыытынан, быйылгы сылтан, үөрэнээччилэр спартакиадаларыгар чөмпүйүөннэри бэлэмнээбит тириэньэрдэргэ биир кэмнээх төлөбүр көрүллэр. Спартакиада үөрүүлээх сабыллыытыгар 31 бастыҥ тириэньэр Ил Дархан 100 тыһ.солк. суумалаах төлөбүрүн тутуоҕа”, – диэн СӨ Бырабыыталыстыбатын бэрэссэдэээтэлин солбуйааччы Сергей Местников бэҕэһээ Дьокуускай куоракка спартакиада үөрүүлээх аһыллыытыгар эттэ.
Бу улахан таһымнаах күрэхтэһиигэ биһиги улууспутуттан 79 оҕо уонна 20 тириэньэр баран кытта сылдьаллар. Сунтаар дэлэгээссийэтин Оҕо спортивнай оскуолатын дириэктэрэ Владимир Данилов иилээн-саҕалаан илдьэ барбыта. Бу үлүгэр элбэх оҕону, тириэньэри салайан илдьэ сылдьыы үрдүк эппиэтинэстээх буолара саарбаҕа суох. Владимир Николаевич бу таһымнаах күрэхтэһииттэн быыс булан төлөпүөнүнэн маннык иһитиннэрии ыытта: «Оҕолорбут бары этэҥҥэ айаннаан кэлэн, билигин күрэхтэһиигэ кыттан эрэллэр. Тириэньэрдэр эмиэ үлэлэрин саҕалаатылар. Бары спортивнай биир тыыҥҥа киирэн, этэҥҥэ күрэхтэһиилэргэ кыттыахпыт диэн бойобуой настарыанньалаах сылдьабыт. Дьокуускайга ыытылла турар бүгүҥҥү күрэхтэһиилэртэн бастакы мэтээл баар буолла диэн иһитиннэрэбин. Ол курдук, Устье оскуолатын үөрэнээччитэ Уйгулаана Потапова гиирэ анньыытыгар II миэстэни ылла!
Бу өрөспүүбүлүкэ таһымнаах биир улахан күрэхтэһиигэ кэлэрбитигэр улууспут үөрэҕириитин управлениета (начальник Альберт Иванов) автобус биэрэн, бэркэ айаннаан кэлбиппитигэр, спартакиада кыттыылаахтарыгар биир тэҥ форманан хааччыйбытыгар биһиги бары махталбытын тириэрдэбит».
Чэпчэки атлетикаҕа үһүс миэстэлээх Никита Кононов
Оттон Горнай улууһун Бэрдьигэстээҕэр бүгүн чэпчэки атлетикаҕа күрэс буола турар. Манна эмиэ улууспут хамаандатыгар биир мэтээл баар буолла! Ол курдук 110 м мэһэйдээх сүүрүүгэ Никита Кононов III миэстэҕэ таҕыста. Никита Сунтаардааҕы политехническай лиссиэй 8-с кылааһын үөрэнээччитэ. Бу туһунан чэпчэки атлетикаҕа старшай тириэньэр Михаил Слюсарь иһитиннэрэр.
Спартакиада бэс ыйын 10 күнүгэр диэри ыытыллар. Оҕолорбутугар, тириэньэрдэргэ ситиһиилэри баҕарабыт.
Яина ВЛАСЬЕВА