2023 с. Сунтаардааҕы гимназияҕа тэриллибит «Сонор»көрдүүр-чинчийэр этэрээт быйыл иккис сылын үлэлээтэ. Салайааччы Сунтаардааҕы гимназия ОБЖ-га учуутала — Сергей Иванов.
«Сонор» этэрээт кыттыылаахтара Аҕа дойду сэриитин хонуутугар охтубут саллааттар уҥуохтарын көрдүүллэр. Ол курдук, ааспыт сылга Старай Руссаҕа этэрээт көмөтүнэн 62 саллаат кырамтата көстүбүтэ.
Бу сылга «сонор» этэрээт уонна Сунтаардааҕы лиссиэй үөрэнээччилэрэ холбоһуктаах бөлөҕүн Ньурбаттан сылдьар Ксенофонт Васильев баһылаан Ильмень күөлгэ муус устар 20 күнүгэр айаннаабыттара. Онно тиийэн Саха сирин атын улуустарыттан уонна Сургут куораттан кэлбит көрдүүр-чинчийэр этэрээттэри кытта холбоһон үлэлээтилэр.
Олохтоохтор кэпсээннэригэр олоҕуран, ыйбыт сирдэрин чинчийэн, саллааттар көмүллүбүт воронкаларын булбуттар. Биир буойун кырамтата көстүбүт. Уута бэрт буолан ситэ хаспатахтар. Инньэ гынан воронкаҕа хас буойун көмүллүбүтэ быһаарыллыбатах. Хаһыы күһүөрү эрэ ыытыллыан сөп диэн буолбут.
Көрдүүр үлэни түмүктүүр үөрүүлээх линейкаҕа Сергей Серафимович салалтатынан, атын улуустартан үлэлэһэ кэлбит ОБЖ учууталларын кытта 19-с хайыһар биригээдэтэ кыргыспыт Ильмень күөлүн үрдүгэр «Хайыһар» ырыаны толорон мустубут дьону долгуппуттар.
Элбэх саха тыынын толук уурбут сиригэр, эһэлэрин, хос эһэлэрин кэриэстээн итиннэ үлэлэспит гимназия уолаттара кэпсииллэринэн, быйыл былырыыҥҥыга холоотоххо хаһарга ыарахан, уулаах, кута буолбут сиргэ үлэлээбиттэр.
Түмүктүүр күҥҥэ үс оскуола үөрэнээччилэрэ, олохтоохтор, оройуон салалтата, телевидение, хаһыат үлэһиттэрэ мустубуттар. Кэнсиэрт буолбут. Манна биһиги оҕолорбут саха ырыатын, олоҥхотун, саха спортивнай оонньууларын көрдөрбүттэр, уопсай оһуокай буолбут. Олохтоохтор маны барытын олус биһирээн көрбүттэр.
Дмитрий ЫМЫЧАНОВ