Сэтинньи 17 к. — Дойду үрдүнэн участковайдар күннэрэ. Сунтаарга 12 участковай үлэлиир, онтон биирдэстэрэ Смоленскай курдук ыраах сиртэн кэлэн үлэлээбитэ сэттис сыла. «Нокоо, кэлиий манна, кэлиий», — диэн үөр атыыра — Нохо нуучча хаһаайына сахалыы тардыалатан саҥарар минньигэс тылын истээт, сүүрэн кэлэр үгэстээх. Бу сырыыга хаһаайыммыт дьонноох диэн утары кэлбэккэ, аһыыр сиригэр үөрүн иннигэр, харыстаабыттыы манаһан турарыгар түбэстибит. Николай Иванов — Смоленскай курдук ыраах сиртэн Сунтаарга үлэлии сылдьар участковай. Сыралаах үлэтин быыһыгар сүүрэн кэлэн кэргэнин дьонуттан хаалбыт хаһаайыстыбаны көрөр-истэр. Николай Сунтаар Ис дьыалатын отделыгар участковайынан үлэлээбитэ сэттис сыла. Кэлээтин кытта Тойбохой өттүгэр анаабыттара. Билигин «хантан сылдьаҕын» диэтэххэ киэн тутта «Тойбохойтон» диирин сэргии иһиттим. Манна хайдах кэлбитэ бэйэтэ туспа онобуллаах. Хотугу Кавказка сулууспалыы сылдьан Юн Олег диэн маннааҕы полицияны кытта көрсөн, кэпсэтиһэн, бастаан хамнаһа үрдүгүн сэргии истэн кэлбит. Онтон кэлин дьылҕам манна аҕалбыт эбит диэн санаатын истиҥник үллэстэр. Николай кэргэннээх, үс оҕолоох. Кини курдук ыраахтан үлэлии кэлбит холобурдар бааллар. Биир оннук холобур — Краснодарскай кыраайтан Дмитрий Кривошея диэн участковай кэлэн үлэлии сылдьыбыта. Онтон хоту көспүтэ, үрдээбитэ, билигин Магадаҥҥа полициялыыр. Ити курдук Сунтаарга үлэлии кэлэн баран олохсуйбуттар, дьоллорун булбуттар биһиэхэ элбэхтэр.
Тускулаана ГОРОХОВА-КОБЕЛЬЯНОВА