Сиэйэ нэһилиэгэ анал байыаннай дьайыыга кытта сылдьар буойуттарга араас хайысхалаах көмөнү оҥорор. Хорсун уолаттар төрөппүттэригэр, дьиэ кэргэттэригэр уолларын, аҕаларын суохтаппат курдук эр киһи оҥорор үлэтин барытын күргүөмүнэн толорорго кыһаллабыт. Ол курдук, нэһилиэк дьаһалтатын көҕүлээһининэн оттук мас тиэйэн биэриитэ, бэлэмнээһинэ, хайытыыта барар. Ону тэҥэ, мууһунан хааччыйабыт. Бу хамсааһыҥҥа ким да туора турбат. Нэһилиэк бары тэрилтэлэрэ көхтөөхтүк кытталлар.
Бу аҕыйах хонуктааҕыта «Радуга» уһуйаан кэлэктиибин иһинэн баар «Кыаллары оҥор» түмсүү анал байыаннай дьайыыга кытта сылдьар уолаттарбытыгар харысхал сиэккэтин өрүүтүн көҕүлээтилэр. Бу үтүө соруктаах хамсааһыҥҥа нэһилиэк олохтоохторо «Кыайыы туһугар!» диэн санаалаах үлэлээтилэр.
Түгэнинэн туһанан, «Радуга» уһуйаан кэлэктиибигэр, салайааччытыгар Арианна Осиповаҕа уонна нэһилиэкпит дьонугар улахан махталбытын тиэрдэбит.
Арсен СЕМЕНОВ
