Сэтинньи ыйга «Баай барыылаах Байанай» ыйыгар анаммыт тэрээһиннэр чэрчилэринэн өбүгэлэрбит төрүт дьарыктарын үйэтитэр, көрдөрөр, үөрэтэр сыалтан оскуола оҕолоругар муҥха тэрилиннэ.
Муҥханы улуустааҕы Аҕа сүбэтэ, улуустааҕы ыччат отдела, «БИИР НЬЫГЫЛ АРАССЫЫЙА» Сунтаардааҕы олохтоох партия салаата, Маар -Күөл нэһилиэгин дьаһалтата, нэһилиэк аҕа сүбэтэ тэрийэн ыытта.
Муҥхаҕа барыта учууталлыын, төрөппүттүүн 430 киһи кытынна. Ол иҺигэр 250 оҕо, Сунтаардааҕы 1, 2, 3 нүөмэрдээх, алын сүһүөх, Маар -Күөл, Арыылаах, Аллаҥа оскуолаларын оҕолоро уонна Тойбохойдооҕу детдом иитиллээччилэрэ. Быйылгы муҥха ССКП чилиэнэ, ll-с Дьаархан нэһилиэгин «Стаханов» холкуос бэрэссэдээтэлинэн үлэлээбит, бастыҥ табаһыт, сылгыһыт, булчут, Маар — Күөл олохтооҕо Иванов Дмитрий Егорович аатын үйэтитиигэ анаан ыытылынна. Кини өр сылларга нэһилиэгэр муҥхалааһыны салайбыт, дьонун — сэргэтин көмүс хатырыктааҕынан күндүлээбит, аҺаппыт, өбүгэ төрүт дьарыктарын, үгэстэрин үйэтиппит, тарҕаппыт киһиннэн киэҥник биллэр.
Эбэҕэ кириэх иннинэ сиэри туому тутуһан алгыс түһэрилиннэ. Кэлбит дьону арыылаах алаадьыннан, уохтаах кымыҺынан күндүлээтилэр. Муҥхаҕа ыраахтан чугастан кэлбит дьону, оҕолору улуус Аҕа баҺылыга Анатолий Григорьев истиҥ иҺирэх тылларынан эҕэрдэлээн туран, өбүгэ төрүт дьарыктарын өрө тутан, оскуола оҕолоругар, эдэр ыччакка көрдөрө — билиҺиннэрэ, үөрэтэ сылдьар кырдьагас муҥхаьыттарга, нэһилиэк баһылыгар, нэҺилиэк Аҕа түмсүүтүн салайааччытыгар махтал суруктары туттартаата.
Эҕэрдэ тыллары улуус Аҕа сүбэтин салайааччыта Борис Уларов, нэһилиэк баһылыга Сергей Саввинов эттилэр. Киэҥ нэлэмэн эбэҕэ муҥха түҺүөр дылы оҕолор тустан күрэхтэстилэр, городки оонньоотулар.
Эбиэккэ нэһилиэк кэрэ аҥаардара оҕолору итии чэйинэн, минньигэс миининэн аһаттылар.
Оҕолор муҥхаҕа туттуллар тэриллэр араастарын биллилэр, туттарга үөрэннилэр уонна астына сибиэһэй салгынынан тыынан, үөрэн — көтөн, илии тутуурдаах, өттүк харалаах тарҕастылар.
Хас биирдии оҕоҕо муҥхаҕа сылдьыбытын туһунан сертификат туттарылынна.
Улуустааҕы Аҕа сүбэтэ