Ил Дархан Айсен Николаев көҕүлээһининэн, “Азия оҕолоро” норуоттар икки ардыларынааҕы VIII спортивнай оонньууларын талисманнарыгар – сэлии оҕотугар уонна моҕотойго аат толкуйдуурга куоҥкурус биллэриллибитэ. Манна 2000 тахса кыттааччы ВКонтакте уонна Телеграм социальнай ситимнэргэ куоластаатылар. Кыайыылаахтар уонна оонньуулар талисманнарын ааттара билиннэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Ол курдук, сэлии оҕотугар күүстээх, кыахтаах диэн өйдөбүлү биэрэн “Модун”, моҕотойго “Саина” диэн ааттар иҥэрилиннилэр. Саина диэн биллэн турар “сайын” диэн суолталаах.
Бу ааттары аан бастакынан Алена Васильева уоннаГелена Горохова талбыттар. Онон кинилэр кыайыылаах буолан, сыаналаах бэлэх тутуохтара.
Санатан этэр буоллахха, эһиил от ыйыгар Дьокуускай куоракка ыытыллар “Азия оҕолоро” спортивнай оонньууга 25 дойдуттан кэлэн успуорт 24 көрүҥэр күрэхтэһэллэрэ күүтүллэр.
“Азия оҕолоро” норуоттар икки ардыларынааҕы спортивнай оонньууну дойду бэрэсидьиэнэ Владимир Путин оҕо-ыччат успуорда сайдыытыгар улахан кыах биэрэр бырайыак диир. Манна Арассыыйа араас регионуттан уонна Азия дойдуларын оҕолоро түмсэр кыахтаналлар, кинилэр доҕордуу сыһыаннара улаатар, сомоҕолоһуу баар буолар диэн Арассыыйа бэрэсидьиэнэ сыаналыыр.
Яина ВЛАСЬЕВА