Бүгүн, алтынньы 4 күнүгэр, улуус дьаһалтатын аактабай саалатыгар СӨ прокурорун бастакы солбуйааччы Сергей Губины кытта көрсүһүү буолла. Прокурору солбуйааччы көрсүһүүгэ массыанньыктартан көмүскэнэргэ аналлаах иһитиннэриини оҥордо. Бу манна тэрилтэлэр, отделлар салайааччылара кытыннылар.
Сергей Анатольевич түөкүттэр дьону албынныыр ньымаларын үгүһү холобур быһыытынан кэпсээтэ. Күн-түүн кинилэр угаайылара элбээн иһэрин сэрэттэ. Ол курдук, өрөспүүбүлүкэбит үрдүнэн информационнай-телекоммуникационнай технологиялары туһанан массыанньыктааһын 11%, оттон төлөпүөн нөҥүө 10% үрдээбитин бэлиэтээн эттэ. Дьон чэпчэки харчыны сырсан, түргэнник байары сымыйанан эрэннэрэр албастарга киирэн биэрэллэрин, түргэнник харчыны үлүннэрээһиҥҥэ угуйалларын сырдатта. Бассаап ситимин нөҥүө дуоһунастаах, биллэр-көстөр да дьон ааттарыттан суруйуохтарын сөп диир. Ону тэҥэ, пенсионнай пуонда, МТС, госуслуга курдук тэрилтэлэр ааттарыттан төлөпүөнүнэн эрийэн албынныыллара элбээбитин сэрэттэ. Угаайыкка киирэр түгэҥҥэ полиция дьуһуурунай чааһыгар эбэтэр өрөспүүбүлүкэ «горячай линиятыгар» төлөпүөнүнэн биллэрэр наадатын иһитиннэрдэ.
Тэрилтэ салайааччылара үлэһиттэригэр өйдөтөр-сырдатар үлэни кэмиттэн кэмигэр ыыталлара наадатын өссө төгүл бэлиэтээтэ. Сэрэхтээх, болҕомтолоох буолалларыгар ыҥырда. Түмүккэ киирбит ыйытыыларга хоруйдаата.
Ытыктабыллаах сурутааччыларбыт, Сунтаарбыт улууһун олохтоохторо күн-түүн ньымалара сайда турар түөкүттэртэн сэрэхтээх буоларгытыгар сүбэлиибит.
Алена ИВАНОВА