Сунтаар нэһилиэгэр “Хаарбах дьиэттэн дьону көһөрүү” тосхолунан Партизанскай уулуссаҕа уонна Сунтарскай переулокка тутулла турар дьиэлэр күлүүстэрин олохтоохтор кэлэр сыл олунньу ыйыгар ылыахтара.
Сунтарскай переулокка баар уопсай дьиэни “Дабанстрой” (дириэктэр Яковлев В.И.) тутуу тэрилтэтэ тутар.
Былырыын бастакы уочаратын киллэрбиттэрэ. Билигин иккис уочаракка 48 кыбартыыра силигэ ситэн турар. Уопсайа бу дьиэҕэ 71 кыбартыыра баар. Саҥа кыбартыыраларга РТС түөлбэтиттэн эргэ уопсай олохтоохторо көһөн кэлиэхтэрэ. Тутааччылар дьиэҕэ ититиитин, уотун ситимин тардан ис үлэтигэр кыра үлэлэри толороллор. Иван Пахомов “Дабанстрой” тэрилтэ маастара: “Билигин хомунуу, ыраастаныы үлэтэ хаалан турар. Бу дьиэҕэ саамай улахан кыбартыыраларбытынан 3 хостоохтор буолаллар иэннэрэ 90 кв.м. тэҥнэһэр. Олохтоохтор күлүүстэрин ыллылар да киирэн олороллорун курдук бэлэмниибит” диэн тутуу бара турар сиригэр көрсөн иһитиннэрдэ.
Кыбартыыралар аныгы бырайыагынан оҥоһуллубуттар, хосторо киэҥ-куоҥ, сырдык, суунар хос муостата, истиэнэтэ кафель бүрүөһүннээх. Хас биирдии кыбартыыраҕа электрическэй оһох уонна итии уу сылытар тэрил туруоҕа. Олбуорга массыына турар парковката уонна “1000 дворов на Дальнем Востоке” бырайыак чэрчитинэн тутуллубут оҕо былаһаакката баар. Олохтоохторго табыгастаах буоларын курдук дьиэ бастакы этээһигэр маҕаһыын арыллыаҕа диэн этэллэр. Доруобуйаларынан хааччахтаах дьоҥҥо, кыра оҕолоох олохтоохторго пандус көрүллэр.
Партизанскай уулуссаҕа тутулла турар 86 кыбартыыралаах 5 мэндиэмэннээх дьиэни “Главстройкомплекс” (салайааччы Исаев А.Э.) тутар.
Бу дьиэҕэ эмиэ ититиитэ тардыллан турар. Ол эрэн, үлэһиттэр иһигэр киирэн көрөрү көҥүллээбэтилэр.
Тутуу бара турар сирин аттыгар баар мас, хаарбах туруктаах уопсай дьиэлэртэн олохтоохтор саҥа киэҥ-куоҥ, сырдык-ыраас кыбартыыраларга көһүөхтэрэ. Оччоҕо сотору кэминэн эргэ уопсай дьиэлэри көтүрэн, таас дьиэлэр дьэндэспит “Улуу Кыайыы 75 сыла” диэн ааттаах саҥа түөлбэ баар буолуоҕа.
Саҥа дьыл өрөбүллэрин кэннэ саҥа дьиэ олохтоохторо мустан мунньахтыахтара диэн олохтоох дьаһалта иһитиннэрэр.
Мира АФАНАСЬЕВА