Самныбат санааланан, сырдыкка дьулуһан

Хас үүнэр күнү үөрэ көрсөргө, олох күннэтэ уунар ыйааһыныттан, кээ­мэйэ суох мөкү өрүтүттэн чаҕыйбакка иннибит диэки хардыы­лаан иһэрбитигэр норуот, олох бэйэтэ айан таһаарбыт бэргэн этиилэрэ кэпсииллэр. Сорохпут кыра кыһалҕаттан бүдүрүйэн арааска бары тиийэр, сорох оннооҕор буолуох кыһалҕалаах олоххо тардыһар…

Биир оннук 35 саастаах ыччат киһи, Василий Сидоров, Аллыҥа нэһилиэгэр олорор. Вася 2020 сыллаахха саахалга түбэһэн курданарыттан аллараа хамнаабат, доруобуйатынан хааччахтаах. Биир үксүн сытар эрэ. Бу сайын реабилитацияҕа баран син арыый өр кэмҥэ олорор буолбута. Дьылҕа Хаан ыйбыт ыйааҕа ыарахана сүүрэр, көтөр сааһын үгэнигэр сылдьар эдэр киһини тоһуппатаҕа, оҕо-уруу тэнитиэхтээх, булан-талан сүүрэн-көтөн дьонугар, сиригэр-уотугар туһалыаҕын быспыта мэһэйдээбэтэҕэ! Вася оҕо эрдэҕиттэн илиитигэр уһулуччу талааннаах уол, уруһуйдьут, уус бэрдэ. «Икки атахпынан хара буорга үктэммэтэрбин даҕаны, икки илиим туһатын, сатабылын хайаан даҕаны күүһүрдэн үлэлиэхпин наада», –   диэн Вася бэйэтин биэнсийэтинэн билигин интэриниэт маҕаһыыннартан тирии, тимир сакаастаан кур оҥорон дьарык, эбии үп оҥостор. Бэйэтэ туһунан «ВС» диэн дьаралыктаах, бэйэ илиитинэн, хаачыстыбаҕа эппиэттиир эр киһи курдарын олохтоохтор тута атыыласпыттара, күүс-көмө буолар күндү дьонугар, табаарыстарыгар бэлэх буолан барбыттара. Билигин дьон сакааһынан дьарыктана сылдьар, аны сорох сакааһа кэллэҕинэ «көһүлүөк оҥорон холонуом» диэн баҕа санаалаах. Мантан кэлин дьон-сэргэ биллэҕинэн, дьарыга сайдан бардаҕына, мин билэрбинэн, улууска бастакынан «Марал» диэбит курдук улахан хампаанньа оҥорон таһаарар сирдэниэ этибит диэн баҕа санаалаахпыт.

Сүүрэр-көтөр кыахтаах, чэгиэн туруктаах эрээри дьиэҕэ олорор, биитэр үлэ суох диэн баран бэринэн кэбиһэн сытар ыччат, хомойуох иһин, биһиги кэккэбитигэр элбэх. Баҕардаххына тугу баҕарар ситиһэҕин. Бэл, орон киһитэ да буолан сытан.

Вася баҕата элбэх, салгыы сайдан дьоҥҥо-сэргэҕэ туһалыан, ким эмэ махталын ылан салгыы олоххо тардыһан, атыттартан туох да уратыта суох олоҕу олороору баҕарар ырата элбэх!

Василий дьарыгын сэргээбит дьон бу нүөмэринэн билсиэххитин сөп 89659954660.

Надежда ИВАНОВА,

«Сунтаар сонуннара» улуус хаһыатын уопсастыбаннай кэрэспэдьиэнэ