Бүгүн Сунтаар 1-кы №-дээх оскуолатын 6-с «а», «в», 7-с, 8-с «в» кылааһын үөрэнээччилэрэ анал байаннай дьайыыга сылдьар саллааттарга истиҥ-иһирэх суруктарын суруйдулар. Оҕолор суруктарын ис хоһоонноро кыайыы буоларыгар эрэллэрин сүтэрбэттэригэр, дойдуларыгар кинилэри чугас дьонноро күүтэллэрин, хорсун саллааттарынан киэн тутталларын туһунан буолла. Ону таһынан харысхаллары, илиигэ кэтэр браслеттары оҥорон бэлэмнээтилэр.
Елена Кокарева, 8-с «в» кылааһын салайааччыта:
— Сылын аайы ыытыллар «Саллаакка сурук» аахсыйаҕа биһиги кылаас оҕолоро көхтөөхтүк кыттабыт. Оҕолор ис сүрэхтэриттэн кыһаллан уруһуйдаатылар, алгыс суруктары уонна харысхаллары оҥордулар. Кылааспытыттан икки оҕобут төрөппүттэрэ байыаннай дьайыыга сылдьаллар. Кинилэр аҕаларыгар истиҥ суруктарын суруйдулар. “Столярное дело”, “Промышленная мастерская” куруһуокка дьарыктанар Арылхан Алексеев, Степан Морозов уонна бу кэмҥэ ыалдьан дьиэлэригэр олорор оҕолор маска «выжигание» ньыманан уруһуйдаан харысхаллары оҥордулар. Оттон кыргыттар илиигэ кэтэр браслеттары быанан өрдүлэр».
Леана Петрова, 8-с «в» кылаас старостата, «Харысхал» уопсастыбаннай түмсүү волонтера:
— «Саллаакка сурук» диэн аахсыйа олус наадалаах дии саныыбын. Оскуола оҕолоро улуустарын сонунун, үтүө санааларын ис сүрэхтэриттэн суруйаллар, ону саллааттар ааҕан, күүс-уох ылан, санаалара көтөҕүллэр. Мин бэйэм Сунтаарбытыгар үлэлиир «Харысхал» уопсастыбаннай хамсааһыҥҥа сылдьан хаххалыыр сиэккэни баайабын. Манан сиэттэрэн оскуола үөрэнээччилэрин аахсыйаларга, гуманитарнай көмө ыытарга, сиэккэ баайарга көхтөөхтүк кытталларыгар ыҥырабын. Байыаннай дьайыыга ким эрэ убайа, ким эрэ аҕата, аймаҕа сылдьар. Ол иһин кинилэри өйөөн, үөрдэн, көмөлөһүөҕүҥ».
Оҕолор суруктара уонна илиилэрин сылааһын иҥэрэн, кыһаллан оҥорбут оҥоһуктара саллааттарга күүстээх харысхал буолан күүстэригэр күүс эбиэ, санааларын бөҕөргөтүө диэн эрэнэбит.
Алена ИВАНОВА