VIII “Азия оҕолоро” оонньууга Сунтаар улууһуттан ХИФУ ИЗФиР корейскай тыл отделениетын устудьуона Татаринова Злата контролер-распорядителинэн үлэлии сылдьар. Злата бэйэтэ Элгээйиттэн төрүттээх. Оонньууларга үлэтин туһунан санаатын бу курдук үллэстэр:
– ХИФУ ИЗФиР корейскай тыл отделениетын 3 кууруһун бүтэрдим. VIII “Азия оҕолорун оонньууларыгар” контролер-распорядитель буолан үлэлии сылдьабын. Бу иннинэ 2022 сыллаахха Владивостокка буолбут VII “Азия оҕолорун оонньууларыгар” волонтердаабытым. Олус астынан кэлэммин кэлэр оонньууларга булгуччу кыттыам дии санаабытым. Оннук тохсунньу ыйга набордааһын буола турар диэбиттэригэр тута суруттарбытым. Араас тэрээһиҥҥэ кыттан, күүстээх бэлэмнэниини ааһан “контролер-распорядитель” диэн дастабырыанньаны ылбыппыт.
Билигин оонньуу саҕаланыаҕыттан тохтоло суох үлэлии сылдьабыт. «Чолбон» бассейҥҥа, «Модун», ДЮСШ-9, «Триумф» успуорт комплекстарыгар үлэлээтим.
Үлэбит диэн оонньуу буолар успуорт эбийиэгэр дьон киирэрин бэрэбиэркэлиибит, металлоискатель, интроскоп туттабыт. Көрөөччүлэр билиэттэрин, спортсменнар бейджиктэрин бэрэбиэркэлиибит. Курэхтэһии буола турдаҕына трибунаҕа туран бэрээдэги көрөбүт.
Маннык улахан тэрээһиҥҥэ кыттыы миэхэ инникитин үчүгэй уопут буолуо дии саныыбын.
Оонньуулар бүтүөхтэригэр диэри салгыы күүскэ үлэлиир былааннаахпын.
Анна ИВАНОВА,
Марфа ИВАНОВА