«Чолбон» сурунаал тэрийиитинэн былырыын «Чолбон өй күрэһэ. Улахан оонньуу» бырайыага өрөспүүбүлүкэ олохтоохторун сэҥээриитин ылбыта. Быйыл Арассыыйаҕа Дьиэ кэргэн, өрөспүүбүлүкэбитигэр Оҕо саас сылларын чэрчилэринэн бу ыйтан өрөспүүбүлүкэ 12 улууһугар, ону сэргэ Дьокуускай куораты хабан саха литературатын билэри, сахалыы ааҕарын таптыыр ыалы көҕүлүүр сыаллаах бу «Чолбон өй күрэһэ. Улахан оонньуу» ыыта сылдьаллар.
Сарсын, олунньу 12 күнүгэр биһиги улууспутугар бу тэрээһин буолар. Онно Л.А.попов аатынан кииннэммит бибилэтиэкэҕэ сарсыарда 11 чаастан «Чолбон» сурунаал кылаабынай эрэдээктэрэ Гаврил Андросовы, сурунаал эппиэттиир сэкирэтээрэ Туяра Павлованы уонна «Саха» НКИХ анал биэрии эрэдээктэрэ, поэт, биир дойдулаахпыт АнгелинаШадринова-Суоһааны кытары көрсүһүүгэ ааҕааччылары ыҥыраллар.
Оттон күнүс 2 чаастан С.А. Зверев-Кыыл Уолун аатынан УНАК «Чолбон өй күрэһэ. Улахан оонньуу» оонньуу ыытыллыаҕа. Манна улууспут 6 ыала кыттар. Ол курдук, Элгээйиттэн Екатерина Филиппова, Алена Филиппова уонна 7-с кылаас үөрэнээччитэ Дима Коркин, Күндэйэттэн Любовь Львова, Людмила Львова уонна 10-с кылаас үөрэнээччитэ Нарыйаана Алексеева, Кэмпэндээйиттэн Герасимовтар дьиэ кэргэн (аҕалара Эдуард Герасимов, ийэлэрэ Лира Герасимова уонна 5-с кылаас үөрэнээччитэ Мичийэ Герасимова), Уһун Күөлтэн Фекла Григорьева, Елена Ноговицына, 8-с кылаас үөрэнээччитэ Юлия Егорова уонна Сунтаартан Зинаида Птицына, Мария Никифорова уонна 1-кы №-дээх оскуола 9-с б кылааһын үөрэнээччитэ Алина Никифорова, иккис дьиэ кэргэн Ирина Сивцева, Юлия Филиппова, политехническай лиссиэй 9-с кылааһын үөрэнээччитэ Эрика Филиппова кыттаары ох курдук оҥосто, кустук курдук куоһана сылдьаллар. Балаһыанньа быһыытынан хас биирдии хамаанда 3-түү киһилээх (5-с кылаастан үөһээ оскуола үөрэнээччитэ, төрөппүт уонна эһэ эбэтэр эбэ (эһэ биитэр эбэ бииргэ төрөөбүтэ кыттыан сөп) буолар.
Бу – күрэс бастакы тургутар түһүмэҕэ. Онтон салгыы финал Дьокуускай буолуоҕа.
Манна даҕатан эттэххэ, «чолбоннор» бырайыактарын СӨ култуураҕа уонна духуобунай сайдыыга министиэристибэтин, «Сахабэчээт» СӨ судаарыстыба автономиялаах тэрилтэтэ өйүүр.
Яина ВЛАСЬЕВА