Арассыыйа үөрэҕин министиэристибэтэ үөрэхтээһиҥҥэ халыыптарын (стандартарын) былааныгар, бырагыраамаларыгар дойдубут бары норуоттарын тылларын, литератураларын, култуураларын үөрэтиигэ оскуолаҕа тыырыллар чаастар барыйааннара чопчуланан, Сахабыт Сиригэр баар бары тылларбытын үөрэтиигэ 2023 сыллаахха иитии-үөрэтии кэнсиэпсийэтэ үөрэх кыһаларынан тарҕаммыта. Маны тэҥэ Сунтаарбыт улууһугар 2023 сыллаахтан төрөөбүт тылбытын харыстааһыҥҥа, сайыннарыыга анал Барыл ылыныллыбыта.
Арассыыйа үөрэххэ министиэристибэтэ дойдубутугар баар бары тыллары үөрэтэр учууталлар идэлэрин таһымыгар күрэстэһиини ыытара үтүө үгэс буолла. Ол курдук, саха тылын учууталларын 2023 сыллааҕы сийиэһин кэнниттэн өрөспүүбүлүкэтээҕи күрэстэһиигэ улууспутуттан эдэр учуутал Любовь Уарова Любовь (Аллыҥа оскуолата) кыттан, лауреат буолары ситиспитэ.
Оттон быйыл муус устар 7-10 күннэригэр Арассыыйаҕа ыытыллар төрүт тыл, литература учууталларыгар бастыҥнары быһаарар күрэс чэрчитинэн өрөспүүбүлүкэтээҕи күөн-күрэскэ Сунтаарбытыттан 3 № оскуола учуутала Анна Алексеева 17 кыттааччыттан лауреат таһымыгар бигэтик таҕыста, Ил Түмэн Бочуотунай кыраамататынан, «Барҕарыы» пуонда бириэмийэтинэн бэлиэтэннэ.
Арассыыйа таһымыгар Дьокуускайтан «Айыы кыһата» оскуола учуутала, суруйааччы, ийэ тылбыт туһугар биллэр туруулаһааччы, уопсастыбанньык Рустам Каженкин Кылаан кыайыылаах аатын ылан, Бурятияҕа баран салгыы күрэстэһэр буолбутун бары даҕаны биһирээтибит.
Биһиги учууталбыт Анна Анатольевна 4 түһүмэх тухары үрдүк таһымнаахтык кыттыбытын, оҕолор уонна дьүүллүүр сүбэ махталларын, ытыс таһыныыларын көрөн, истэн, бэйэм астынным уонна киэн тутуннум. «Педагогическая мастерская», «Урок», «Час с классом», «Мастер-класс» түһүмэхтэри чопчутук, иэйиилээхтик, айымньылаахтык ыыталаата. Бу соторутааҕыта куоракка ыытыллыбыт С.А.Сибиэрэп-Кыыл Уолун үбүлүөйүгэр аналлаах тэрээһиннэри сэргэ, Анна Анатольевна норуоппут төрөөбүт тылын сүмэтин тарҕаппыт, элбэх өрүттээх баай нэһилиэстибэтин ыччакка тарҕаппыт улуу киһибит туһунан үтүө өйдөбүлү үөрэнээччилэргэ иҥэрдэ, кэрэхсэттэ, сиэрдээх дьон буола иитиллэллэригэр олугу уурда.
Анна Анатольевна баай ис хоһоонноох С.А.Сибиэрэп-Кыыл Уолун туһунан электроннай презентациятын Үөрэҕи сайыннарар уонна учуутал идэтин таһымын үрдэтэр Институт үлэһиттэрэ биһирээтилэр уонна сайтка таһаараары, тарҕатаары, илдьэ хааллылар.
Айымньылаахтык үлэлиир учууталбытыгар Анна Анатольевнаҕа, Сунтаар 3 № оскуолатын кэлэктиибигэр (дириэктэр А.Н.Николаев), Л.А.Попов аатынан Арыылаах оскуолатыгар үөрэппит учуутала, настаабынньык Елена Ноговицынаҕа, өйөбүл-сүбэ буолбут бииргэ үлэлиир учууталларыгар Ангелина Николаеваҕа, Дария Павловаҕа, Раиса Алексеева5а уо.д.а. махталбытын биллэрэбин.
Олоҥхо дойдута Сунтаарбытыгар сахабыт тылын, култууратын өрө тутан, саха буолан сандаарыахха, киһи буолан килбэйиэххэ!
Татьяна ЖИРКОВА, үөрэх салалтатын методиһа