Дьаархан оскуолатын алын кылааһын үөрэнээччилэрин ортолоругар аан бастакытын саха төрүт оҕунан ытыыга аһаҕас күөн-күрэс — «Байанай бэлэҕэ» буолан ааста.
Оҕолорбут бары сахалыы таҥнан, симэнэн кэлбиттэрэ көрүөххэ астык. Барыта 23 оҕо икки бөлөҕүнэн кыыс, уол диэн арахсан ыттылар. Күрэхтэһиини көрө кылаас салайааччылара уонна төрөппүттэр кэлбиттэрэ олус хайҕаллаах. Күрэхтэһии үөрүүлээх аһыллыытыгар оскуолабыт дириэктэрэ Николай Охлопков эҕэрдэ тылынан, ким сытыы харахтаах, бэлэмнээх ол кыайдын диэн баҕа санаатын эттэ.
Күрэҕи алын кылаас кыргыттара «куобах» көрүҥүттэн саҕалаатылар. Ол курдук, бары бэрээдэгинэн ытыалаан истилэр. Сыалын таппыт оҕо үөрүүтүттэн өрүтэ эккирээһиннээх, таппатах оҕо хараҕын уутун нэһиилэ кыанан туттунуулаах, бэрт долгутуулаах түгэннэр буолуталаан аастылар. Күрэхтэһиибит этэҥҥэ түмүктэнэн, кыайыылаахтары быһаарар долгутуулаах түгэммит үүннэ. Ол курдук, алын сүһүөх кылаас үөрэнээччилэригэр түмүк маннык буолла: (1-2 кыл.) кыргыттарга I м. — Кэрэли Иванова, II м. — Настя Тимофеева, III м. — Дойдууна Кондратьева (үһүөн бастакы кылаас үөрэнээччилэрэ). Уолаттарга: I м. — Ильдар Семенов, II м. — Уйгулаан Алексеев, III м. — Гоша Егоров (үһүөн иккис кылаас үөрэнээччилэрэ).
3-4 кылаас кыргыттарыгар I м. — Айхаана Алексеева уонна II м. буолбут Лилия Егорова. Кыргыттар очкуолара тэҥнэһэн хос кыайыылааҕы быһаарар ытыы түмүгүнэн туһааннаах миэстэлэри үллэһиннилэр. III м. — Сайнаара Степанова (үһүөн эмиэ үһүс кылаас кыргыттара). Уолаттарга: I м. — Эдгар Степанов (үһүс кылаас), II м. — Антон Семенов (төрдүс кылаас), III м. Афоня Охлопков (үһүс кылаас).
Кыайыылаахтар түөскэ кэтэр мэтээли кэттилэр, туоһу суругу кытары оскуолабыт салалтата туруорбут сэмэй бирииһин тутаннар, күрэхтэһии күүрээнин, долгуйуутун, үөрүүтүн тус бэйэлэринэн биллилэр. Миэстэлэспэтэх оҕолор даҕаны илии тутуурдаах тарҕастылар, ол курдук кылаас салайааччылара, төрөппүттэрэ аан бастакытын оҕунан ытар оҕолорун өйөөннөр бэлэх арааһын туттардылар.
Күрэхтэһиибитигэр бэйэбит оскуолабыт оҕунан ытар кыргыттара, улууспут, Бүлүү түөлбэтин чөмпүйүөнкэлэрэ, призердара Күндүлээнэ Маркова, Айыына Семенова, Айгыына Павлова олус чуолкайдык судьуйалаатылар, бочуоттаах миэстэлэри ылбыт оҕолорго мэтээли, туоһу суругу туттардылар.
Күрэхтэһиибит сыалын ситтэ, оҕолорбут олус астынан тарҕастылар. Түгэнинэн туһанан, оскуолабыт дириэктэригэр Николай Охлопковка оҕолор, төрөппүттэр уонна кылаас салайааччыларын ааттарыттан махтал үтүө тылларын аныыбыт.
Павел КЫРЕЛОВ, күрэхтэһиини тэрийээччи, Дьаархан орто оскуолатын физическэй култуураҕа учуутала