«Саха сирин олохтооҕун каартата» үгүс чэпчэтиилэри туһанарга кыах биэрэр. Ол курдук, бары социальнай төлөбүрдэри оҥоруохха, биэнсийэни, истипиэндьийэни уо.д.а төлөбүрү ылыахха сөп. Каарта кумааҕы докумуоннартан аккаастанарга көмөлүүр, ону тэҥэ култуура уонна успуорт тэрилтэлэригэр, маҕаһыыннарга, аптекаларга чэпчэтиилэринэн уонна бонустарынан туһанарга, уопсастыбаннай тырааныспарка айан төлөбүрүн төлүүргэ, көтөр аалынан чэпчэтиилээх билиэт атыылаһарга туһаныллар.
Биһиги куоракка бардахпытына, автобустарга айан бырайыаһын «Саха сирин олохтооҕун каартатынан» олохсуйбут сыанаттан арыый чэпчэкинэн төлөөн айанныыбыт. Бу маннык өҥө аны биһиги улууспутугар, чуолаан Сунтаар иһигэр сылдьар маршрутнай автобустарга эмиэ туттуллар буолан эрэр. «Алмаасэргиэнбаан» каартата киһи аайы баар эрээри, сорохтор тырааныспарга туһаныллар өҥө сыһыарыытын холбоммокко сылдьар эбиппит. Онон бу сыһыарыыны холбонон, автобустарга чэпчэтиилээх өҥөнү туһаныахха.
Бу сыһыарыыны хайдах холбонноххо үлэлиирин «Алмаасэргиэнбаан» Сунтаардааҕы допофиһын салайааччыта Эллада Николаева маннык быһаарар:
– «Саха сирин олохтооҕун каартата» – босхо хааччыйар баан каартата уонна хантаага суох төлүүр технологиялаах. Бу каартанан автобуска айан иһин чэпчэтиинэн туһанар нэһилиэнньэ араҥата туох да хааччаҕа суох айанныыр. Бырайыаһы төлүүргэ ыйга 598 солк. каартаҕар баар буолуохтаах. Өскөтүн каартаҕар тырааныспартынай сыһыарыы холбоммокко сылдьар буоллаҕына, эбэһээт холбоноҕун. Оттон кэлэр ыйдарга бэйэтэ холбонон үлэлээн иһэр буолар. Биһиги офиспытыгар кэлэн оҥорторуоххутун сөп.
Оттон Сунтаар иһигэр автобуска сырыыга кимнээх чэпчэтиилээх сыананан сылдьалларый диэн улуустааҕы социальнай харалта управлениетын салайааччытыттан Михаил Тимофеевтан сурастым:
– Бу өҥөнөн федеральнай чэпчэтиини туһанааччылар — сэрии инбэлииттэрэ, Аҕа дойду сэриитин кыттыылаахтара, байыаннай дьайыы бэтэрээннэрэ, «Ленинград блокадатын олохтооҕо» бэлиэнэн наҕараадаламмыттар, Аҕа дойду улуу сэриитин кыттыылаахтарын, инбэлииттэрин тулаайахтара, инбэлииттэр, инбэлиит оҕолор уо.д.а. тутталлар. Ону таһынан тыыл, үлэ бэтэрээннэрэ, ССРС, РФ үлэ Дьоруойдара о.д.а. чэпчитиилээх бырайыаһы туһанар кыахтаннылар.
«АТП» тэрилтэ салайааччыта Элина Яковлеваттан «Саха Сирин олохтооҕун каартатынан, нэһилиэнньэ ити үөһэ ыйыллыбыт араҥатыгар айан олохтонно дуо? диэн туоһуластым:
– Сунтаар нэһилиэгин иһигэр сүүрэр 2 маршрукка иккиэннэригэр босхо айанынан бүгүҥҥү күҥҥэ элбэх оҕолоох ыал оҕолоро туһаналлар. Элбэх оҕолоох ыал оҕолоро балаҕан ыйын 1 күнүттэн бу чэпчэтиинэн туһаналлар. Бастаан талонунан сылдьаллар этэ, сэтинньи 1 күнүттэн каарталара оҥоһуллан кэлиэҕиттэн босхо сырыы школьнай каартанан олохтоммута.
Оттон бу чэпчэтии олохтоноругар «Алмаасэргиэнбааны», улуустааҕы социальнай харалта управлениетын кытары ыкса үлэлэһэбит.
Билигин биһиги автобустарбыт сүүрбэккэ тураллар, ону айанньыттар табатык өйдүөхтэригэр эрэнэбин. Ирдэниллэр докумуоннарын толорон бу кылгас кэминэн Сунтаар иһигэр сүүрүөхтэрэ.
Онон «Саха сирин олохтооҕун каартатынан» чэпчэтии туһанар нэһилиэнньэ бу араҥата автобустар сүүрдүлэр даҕаны, чэпчэтиилээх айанынан туһаныаххытын сөп эбит.
Яина ВЛАСЬЕВА