Дьокуускайга «Мин Арассыыйам» историческай пааркаҕа «Оҕо саас сирдьиттэригэр» үс күннээх оскуола үлэлээтэ. Ол иһигэр Саха сирин бастыҥ дириэктэри иитэр үлэҕэ сүбэһит күрэһэ тэрилиннэ.
2022 сыллаахха Арассыыйа 45 эрэгийиэнин оскуолаларыгар дириэктэри иитэр үлэҕэ сүбэһит диэн эбии үлэ миэстэтэ кɵрүллүбүтэ. Мантан саҕалаан оҕону иитиигэ, патриот киһи буола улаатарыгар ɵссɵ улахан болҕомто ууруллар уонна үлүскэн үлэ барар. Нюргуяна Макарова — Сϴ Оҕо саас сирдьиттэрин эрэгийиэннээҕи координатора: «Бу күрэс сыалынан дириэктэри иитэр үлэҕэ сүбэһиттэр статустарын үрдэтии уонна бастыҥ үлэлээх сүбэһиттэртэн уопут ылыы буолар».
Аан бастакытын тэриллэр «Сыл бастыҥ сүбэһитэ» күрэскэ 62 киһиттэн эрдэ хас да сүүмэрдээһини ааспыт бастыҥ алта сүбэһит кытынна. Кыргыттар бары оҕолору, тɵрɵппүттэри, уопсастыбаннай түмсүүлэри кытта үлэлиир кэскиллээх барыллаахтар, үлэлэригэр хайы сах олус элбэх ситиһиилээхтэр.
Күрэс үс түһүмэхтээх буолла, бэйэни билиһиннэрии, «Планка успеха» диэн ааттаах түһүмэххэ ыыппыт үлэлэрин түмүктэрэ уонна аһаҕас уруок. Кыайыылааҕынан Сунтаар политехническай лиссиэйин сүбэһитэ Айта Гуринова буолла.
Кини бэйэтин билиһиннэрэригэр Сунтаар хамаандата бары кɵхтɵɵхтүк кыттан, сүбэһит күннээҕи олоҕун чаҕылхайдык арыйдылар, туох сыаллаах үлэлиирин арылхайдык кɵрдɵрдүлэр. Онтон «Планка успеха» түһүмэххэ Сунтаартан анаан тиийэн «Оһуор үҥкүүтүн ɵрɵ тутуох» диэн С.А. Зверев-Кыыл Уолун 125 сыллаах үбүлүɵйүгэр аналлаах ааксыйа ыҥырыыбытын кɵмүскээтибит, бэл диэтэр «Оһуор үҥкүүтүттэн» саҕыллан тахсыбыт Тоҕус оһуордаах хамнаныыны бар дьоҥҥо кɵҕүлээн алгыһы ылынныбыт. Онтон үһүс түһүмэххэ Айта «Сɵбүлүүр дьарык» диэн аһаҕас уруогу олус айымньылаахтык ыытта, манна кэргэнинээн Игнат Федоров — уһуйаан иитээччитин кытта оҥорбут «Байанай» оонньууларын олус бэркэ оонньотон тэрээһин дьонун сэргэхситтилэр.
Күрэс үс күннээх Оҕо саас сирдьиттэрин үɵрэхтээһинин кэмигэр ыытылынна. Сунтаартан 9 киһи кэлэн кытынна. Аһаҕас кэпсэтиигэ улуустартан элбэх этии ылылынна, ол онно биһиги хамаандабыт этиитэ Сибиэрэп 125 сылыгар туһуланна. Вера Саввинова — Сунтаар улууһун Оҕо саас сирдьиттэрин куратора: «Муус устар 9 күнэ — Сибиэрэп күнэ. Бу бэлиэ күнү бүтүн өрөспүүбүлүкэ таһымыгар кɵҕүлээн ыытыахха диэн этии оҥорбуппутун тэрийэр сүбэ ылынан, бу күн Саха сирин бары муннугар Кыыл Уолун аата ааттаныаҕа!».
Бастыҥ сүбэһит — оҕо-аймах доҕоро, кэмигэр уһуйааччыта, сүрүнэ олоххо сирдьитэ.
Тускулаана ГОРОХОВА-КОБЕЛЬЯНОВА, ДЬокуускай