“Дьиэ кэргэн килбиэнэ” («Семейная доблесть») анал бэлиэнэн 50 сылтан ордук кэм холбоһон олорбут, үбүлүөйдээх сылларын бэлиэтиир, оҕону иитиигэ ураты үтүөлээх, дьиэ кэргэн сыаннастарын өрө туппут, Саха сиригэр 10 сылтан кырата суох кэм олорбут ыаллар наҕараадаланыахтара.
Бу саҥа наҕарааданы Айсен Николаев дьиэ кэргэн, ыал буолуу институтун бөҕөргөтөр, үгэс буолбут дьиэ кэргэн сыаннастарын өрө тутар, харыстыыр, дьиэ кэргэҥҥэ уонна уопсастыбаҕа төрөппүт аатын үрдэтэр соруктаах олохтообутун туһунан СӨ Ил Дарханын уонна Бырабыыталыстыбатын пресс-сулууспата суруйар.
“Дьиэ кэргэн килбиэнэ” кыһыл көмүс өҥнөөх остуолга ууруллар анал бэлиэни кытта СӨ Ил Дархана илии баттааһыннаах сибидиэтэлистибэ туттарыллар.
Эрдэ Арассыыйа бэрэсидьиэнэ Владимир Путин дьиэ кэргэн судаарыстыба бэлиитикэтин инники күөнүгэр буолуохтаах диэн этэн турар.
Санатар буоллахха, 2024 с. Арассыыйаҕа Дьиэ кэргэн сылынан биллэриллибитэ.
«Сунтаар сонуннара» хаһыат.
Хаартыскаҕа: Сунтаар ытык ыаллара Васильевтар дьиэ кэргэн.