Бүгүн Дьокуускайга «Үлэ кыбаартала» креативнай кластерга Саха сиринээҕи киинэ холбоһуктарын сыллата ыытыллар кэмпириэнсийэтигэр «Экстра Синема» технологиянан үлэлиир киинэ саалата Саха сирин 15 нэһилиэгэр аһыллар тэрээһинэ буолла.
Санатар буоллахха, бу «Экстра Синема» диэн өрөспүүбүлүкэтээҕи бырайыагынан былырыын 10 нэһилиэк киинэ саалаламмыта. Быйыл куоҥкурус быһыытынан сүүмэрдэнэн, 17 култуура киинигэр киинэ көрдөрөр саалалар аһыллар буолбуттара. Бүгүн 15 нэһилиэк киинэ көрөр саалаланна! Бу күн СӨ Ил Дархана үөрүүлээх, историяҕа хаалар бэлиэ тэрээһиҥҥэ ВКС нөҥүө холбонон, нэһилиэктэри бу дьоро түгэнинэн эҕэрдэлээтэ.
Бу аһыллыбыт 15 киинэ саалатыттан иккитэ Сунтаар улууһугар: Элгээйигэ уонна Сиэйэҕэ.
Элгээйитээҕи «Оһуор» култуура киинигэр бу бэлиэ түгэҥҥэ кыттыыны ылаары олохтоохтор муһуннулар. Киинэ саалатын лоп курдук 70 сыл анараа өттүгэр үөрэҕин бүтэрэн кэлэн, өр сылларга киномеханигынан үлэлээбит Липа Никандровна Кириллинаны чиэстээн, «Липа Cinema» диэн ааттаатылар.
Сиэйэтээҕи Ю.М. Гурьев аатынан култуура киинигэр «Сиэйэ» киинэ саалатын арыйыыга эмиэ үгүс киһи тоҕуоруһа муһунна.
Киинэ саалата үлэтэ саҕаламмытын үөрүүлээхтик арыйыы кэннэ «Бүгүн былыр» диэн сахалыы киинэни көрөөччүлэргэ көҥүл көрдөрүү буолла.
«Мантан инньэ саҥа тахсар киинэлэри Дьокуускай куораты кытары улахан экраҥҥа тэҥҥэ көрөр кыах баар буолла», — диэн нэһилиэктэр олохтоохторо үөрэллэр.
Марфа ИВАНОВА.
Татьяна СЕМЕНОВА хаартыскаҕа түһэриилэрэ.
Хаартыскаҕа: Нэһилиэк баһылыга П.А. Григорьев, өр сылларга киномеханигынан үлэлээбит Л.Н. Кириллина уонна «Оһуор» култуура киинин директора В.Н. Семенов.