Саха сирэ – Арассыыйа быстыспат сорҕото

Бүгүн Арассыыйа күнүгэр Кэмпэндээйи олохтоох бибилэтиэкэтэ уонна Арассыыйа ийэлэрин түмсүүтэ «Биһиги киэҥ Ийэ дойдубут» диэн ааттаах тэрээһини ыытта.

Мустубут оҕолор дойдуларын гимнин ыллаатылар. Олохтоох дьаһалта баһылыгын солбуйааччы Розалия Тихонова эҕэрдэ тылын тириэртэ. Кини бүгүҥҥү күн суолтатын, модун күүстээх дойдуга олорорбутун, Саха сирэ дойдубут биир улахан өрөспүүбүлүкэтэ буоларын, киһи туһугар элбэх үлэ барарын кэпсээтэ.

Ыраата барбакка, биһиги кыра Кэмпэндээйибитигэр саҥа кулууп тутуллан үлэҕэ киирдэ, аҕыйах сылынан оҕолор сырдык, киэҥ оскуолаҕа үчүгэйдик үөрэнэн төрөөбүт Ийэ дойдуларыгар туһалаах, төһүү күүс дьоно буола улааталларыгар баҕарда. Онтон оҕолор кинигэ быыстапкатын кытары билистилэр, Арассыыйа, Москва, дойду символларын, чулуу дьоннорун туһунан билистилэр, ырыа-хоһоон аахтылар, иһиттилэр. Түмүккэ тэрээһин хайысхатынан ыйытык оонньууга эппиэттээтилэр. Оҕолор билиилэрин Арассыыйа ийэлэрин түмсүүтүн салайааччыта Любовь Осипова сыаналаан сөптөөх эппиэттэр иһин минньигэс кэмпиэттэринэн күндүлээтэ.

Татьяна МЕСТНИКОВА, бибилэтиэкэр

Читайте дальше