Иитиллибит ийэ тылынан санааны сайа этэр тыл күрэһэ Сэргэй Сибиэрэп аатынан фольклор түмэлин бырайыагынан быйыл үһүс төгүлүн ыытылынна. Уйбаан Нуолур аатынан модельнай бибилэтиэкэ сырдык саалыгар Элгээйи нэһилиэгин тэрилтэлэрин, түмсүүлэрин хамаандалара этигэн тыл түһүлгэтин төрүттээтилэр.
Күрэс икки түһүмэҕинэн, «Сахам тылын сайдар кэскилэ», С.А.Зверев-Кыыл Уолун 125 сылынан «Үйэлэр сүгүрүйэр киһилэрэ», Улуу Кыайыы 80 сылынан «Ким да умнуллубат, туох да умнуллубат» тиэмэлэринэн куолаан этии быһыытынан барда. Үстүү киһи састааптаах хамаанда бэйэтин билиһиннэрэн, талбыт тиэмэтин киэҥник арыйан, хамаанда хас биирдии кыттааччыта тус санаатын этэн-тыынан, истээччигэ тиэртэ.
Аҕа дойду Улуу сэриитин сылларын чахчыларыгар, уоттаах сэриигэ кыттыбыт килбиэннээх дьоммут ааттара үтүмэн сылларга умнуллубакка, сүппэккэ хааларыгар, С.Зверев айымньыларын, үҥкүүлэрин туруорууга, национальнай концепция сөргүтүллэн саха ырыата-тойуга тэнийэригэр, төрөөбүт тыл суолтатын үрдэтиигэ, уһуйааҥҥа оҕо сахалыы тыыҥҥа иитиллэригэр, араас көлүөнэ ийэ тылга сыһыаныгар анаарыы курдук санаалар этилиннилэр. Бу этиллибит тыллар хомус дьүрүскэнинэн, кырыымпа дьикти тыаһынан арыалланан истиҥ, сылаас эйгэ олохтонно.
Этигэн тыл күрэһин олохтоох дьаһалтаттан Мария Яковлева, «Оһуор» култуура кииниттэн Эльвира Николаева, модельнай бибилэтиэкэттэн Татьяна Семенова, фольклор түмэлиттэн Ксения Семенова сыаналаатылар.
Күрэс түмүгүнэн Кылаан Кыайыылаах — «Үс эйгэ» оҕо искусствоҕа оскуолата, «Уус-уран тыл» анал аат — орто оскуола, «Хомоҕой тыл» анал аат — «Елочка» оҕо уһуйаана, «Биһирэм тыл» анал аат — «Үс саха» — «Көмүс саас» түмсүүтэ, «Сайдам тыл» анал аат — «Оһуор» КК, «Кэскиллээх тыл» анал аат — «Икки көлүөнэ» — ЭВА уонна эдэр ыччат ыллылар.
Уоскулаҥҥа «Тыл оонньуутун» Олимпиада Захарова, Мария Чагдинская тэрийэннэр, этигэн тыл кыттыылаахтарын саха тылын киэҥ хонуутугар көччүттүлэр.
Ийэ тылбыт сарсыҥҥыта саргылаах буоллун!
Ксения СЕМЕНОВА,
Фольклор түмэлин салайааччыта