С.А.Зверев-Кыыл Уолун аатынан Элгээйитээҕи фольклор түмэлэ, Уйбаан Нуолур аатынан модельнай библиотека уонна олохтоох дьаһалта тэрийиилэринэн фольклор түмэлигэр тыл ыйынан «Саха этигэн тыла» диэн Элгээйи куустатын нэһилиэктэрин дьокутааттарыгар тыл этии (араатардааһын) күрэһэ ыытылынна. Нэһилиэктэрин туһугар этэр-тыынар, сүүрэр-көтөр, саха тылын өрө тутар, үс хорсун дьокутаат бэйэлэрин тус санааларын этэн кыттыыны ыллылар.
Дьүүллүүр сүбэҕэ бэрэссэдээтэлинэн Элгээйи олохтоох дьаһалта аҕа баһылыга Павел Григорьев, чилиэннэринэн П.Х.Староватов аатынан оскуола дириэктэрэ София Игнатьева, Уйбаан Нуолур аатынан модельнай библиотека сэбиэдиссэйэ Татьяна Семенова үлэлээтилэр.
Күрэс икки түһүмэҕинэн ыытылынна. Бастакы түһүмэххэ кыттааччылар «Төрөөбүт төрүт тыл» диэн тиэмэҕэ бэйэлэрин санааларын эттилэр. Иккис түһүмэххэ 4 тиэмэттэн талан ылан кэпсээтилэр. Хороттон Вера Иванова «Биһиги бириэмэбит дьоруойдара» диэн тиэмэҕэ Элгээйи оскуолатын үөрэнээччитэ Вадим Иванов хорсун быһыытын кэпсээтэ. Элгээйитээҕи Б.Н.Андреев аатынан ЭРМЭК эбии үөрэхтээһин педагога, нэһилиэк дьокутаата Сардаана Герасимова «Дьиэ кэргэн – уопсастыба тирэҕэ», урбаанньыт, «Астык» кондитерскай сыах салайааччыта Туйаара Иванова «Сайда тур, нэһилиэгим» диэн тиэмэлэргэ тус санааларын тириэрдэн тыл эттилэр.
Күрэс түмүгэ маннык таҕыста. «Кылаан кыайыылаах» анал ааты Хороттон «Харысхал» култуура киинин дириэктэрэ, нэһилиэк дьокутаата Вера Иванова, «Сайдам тыллаах этээччи» ааты Сардаана Михайловна Герасимова уонна «Ылыннарыылаах тыллаах этээччи» ааты Туйаара Иванова ыллылар уонна олохтоох дьаһалта бирииһин туттулар.
Ити курдук, нэһилиэк дьокутааттара сахалыы сайаҕастык саҥаран, иэйиилэрин истиҥник этинэн бэрткэ кытыннылар.
Ийэ тылбыт үйэлэргэ сүппэккэ үүнэ-сайда турдун!
Олимпиада ЗАХАРОВА, С.А.Зверев-Кыыл Уолун аатынан фольклор түмэлин фонда харайааччыта