Бүгүн, кулун тутар 7 күнүгэр «Партизан» норуот айымньытын театральнай киинигэр, ОДьКХ ГУП Сунтарадааҕы филиалын эр дьоно бэртээхэй кэнсиэри көрдөрдүлэр. Ол курдук, хомунаалынай хаһаайыстыба күүстээх аҥаардара «Сааскы серенада» диэн ааттаах кэнсиэри улуус бары кэрэ аҥаардарыгар анаатылар.
Кэнсиэркэ ОДьКХ нэһилиэктээҕи учаастактарыттан талааннаах эр дьон үгүстэрэ киирбиттэр.
Бу кэнсиэр буолуон иннинэ сүрдээх үчүгэй рекламнай роликтары тарҕатан үгүс дьон болҕомтотун тарпыттара. Онон Сунтаар нэһилиэгин олохтоохторо, ыалдьыттара хомунаалынай хаһаайыстыба үлэһит эр бэртэрэ үрдүк таһымнаах кэнсиэри көрдөрөллөрө буолуо диэн эрдэттэн таайа-сибикилии сылдьыбыттара. Онтулара чахчы да оннук буолла.
Көрө кэлбит кэрэ аҥаардар эр дьоҥҥо махтаннылар, сынньанан, үөрэн-көтөн дьиэлэригэр тарҕастылар.
Дмитрий ЫМЫЧАНОВ