Сунтаар улууһун дьаһалтата анал байыаннай дьайыыга кытта сылдьар уолаттар дьиэ кэргэттэригэр анаан бэлиэ күннэргэ тэрээһин ыытара үгэскэ кубулуйда. Бу сырыыга, сааскы маҥнайгы бырааһынньыгынан — Аан дойду дьахталларын күнүн чэрчитинэн кэрэ аҥаардарга сибэкки дьөрбөтүн бэлэхтээтилэр, араас маастар-кылаастарга сырытыннардылар, ылбаҕай ырыа киэһэтигэр ыалдьыттаттылар.
Бүгүҥҥү көрсүһүүлэригэр ийэлэр, кэргэттэр сахалыы тыыннаах маастар-кылаастарга сырыттылар. Ол курудук, норуот талба талааннаахтарыгар тойукка, хомуска, норуот ырыатыгар, иискэ уһуйулуннулар. Ону тэҥэ, сиэр-туом туһунан элбэҕи биллилэр, кут-сүр ыраастаныытыгар сырыттылар, доруобуйаларын туругун көрдөрдүлэр.
Тэрээһиҥҥэ ыраах сытар Тэҥкэ нэһилиэгиттэн Лена Тихонова үс саллаат ийэлэрэ буолан киирбиттэр: «Мин уолум Степан анал байыаннай дьайыыга 2022с. аармыйа кэнниттэн хантараак баттаһан барбыта. Оҕобун көрсө Ростовка тиийэ сылдьыбытым. Күннэтэ оҕолорбутуттан сонун күүтэбит. Нэһилиэкпит дьоно анал байыаннай дьайыыга сылдьар дьиэ кэргэттэргэ мэлдьи көмөлөһөллөр, өйөбүл-тирэх буолаллар. Онон түгэнинэн туһанан кинилэргэ махталбын биллэрэбин «.
Сунтаар улууһун баһылыгын социальнай уонна имиджевэй бэлиитикэҕэ солбуйааччыта Альберт Иванов: «Сунтаар улууһун дьаһалтатын иһинэн «Аҕа дойдуну көмүскээччилэр пуондата» үлэлиир. Анал байыаннай дьайыы кыттыылаахтарын дьиэ кэргэттэригэр үөскээбит кыһалҕаларын уталыппакка быһаарарга кыһаллабыт. Тустаах дьон көрдөһүүтүгэр тутатына хардарар курдук социальнай ситимнэргэ эмиэ үлэлиибит«.
Светлана Янкова, Сунтаар нэһилиэгин олохтооҕо: «Мин орто уолум Чечня сэриитин бэтэрээнэ анал байыаннай дьайыыга кыттыыны ыла сылдьар. Ордук СВОттан эргиллэн кэлбит уолаттары уйулҕаларын сааһылыыр курдук анал психолог идэлээх дьон үлэтэ наада. Ону тэҥэ, психологтар аҥаардас уолаттары эрэ кытта буолбакка, кинилэр дьиэ кэргэттэрин кытта эмиэ үлэлээтэхтэринэ бөҕө туруктаах буолуохтара. Саамай сүрүнэ — эргиллэн кэлбит уолаттары үлэнэн хааччыйыахха наада. Анал байыаннай дьайыыга сылдьааччылар дьиэ кэргэттэригэр тустаах көмө, өйөбүл баар буоллаҕына, уолаттарбыт ордук бигэ тирэхтээх, бөҕө куйахтаах курдук сананыахтара буоллаҕа».
Надежда Егорова, Сунтаар нэһилиэгин олохтооҕо, «Харысхал» уопсастыбаннай түмсүү кыттыылааҕа: «Төһө да уолаттарбыт ыраах сырытталлар ийэлэрин, чугас дьоннорун үөрдэргэ олус кыһаллаллар. Бу аҕыйах хонуктааҕыта СВО-ҕа сылдьар уол ийэтигэр сибэкки дьөрбөтүн сакаастаан ыыттарбытын илдьэн биэрбиппит. Ийэ барахсан уолуттан истиҥ бэлэх тутан олуһун үөрбүтэ. Бу буоллаҕа ийэҕэ таптал, дойду ахтылҕана… «
Көрсүһүүгэ кэлбит күн күбэй ийэлэр, кэрэ-нарын кыргыттар, далбар хотуттар күн эргииринэн оһуокайга эргийэн уолаттар чэгиэн-чэбдик туруктаах түргэнник дойдуларыгар эргиллэн кэлэллэригэр баҕа санааларын эттилэр, алгыс тылларын анаатылар.
Мира АФАНАСЬЕВА
