Көрүҥҥүтүүй, астык дии! Бэҕэһээ бобуулаах социальнай ситими хаһа олорон, бу интэриэһинэй дьарыктаах кыыс инстаграм-сирэйигэр түбэстим. Икки хонуктааҕыта укпут рилса билигин номнуо 6 тыһыынчаттан тахса “лайк” хомуйбут. Николай Якутскай “Төлкө” арамаанын Саха сиринээҕи кинигэ издательствота таһаарбыт 1973 сыллаах кинигэтин
таһын ураннык даҕаны саҥардан биэрбит, саха норуотун биир сүдү айымньытын кинигэтин өссө уһун үйэлээбит. Эбиитин кыыспыт Сунтаар оҕото буоларын биллим. Сунтаар нэһилиэгин олохтоохторо Дария Ивановна, Николай Пантелеймонович Поповтар иккис кыыстара, билигин Дьокуускайга олорон айар-тутар Айна Попова эбит.
Айна бэйэтэ архитектор уонна кэриэйэ тыла үөрэхтээх. Кини интэриэһинэй дьарыгын көрдөрөөрү тэттик видео оҥорон бэйэтин дьоҕус ахсааннаах сурутааччыларыныын үллэстибитэ куйаар ситими, этэргэ дылы, “эстэрбититтэн” бэйэтэ да соһуйбут. Араас элбэх киһи кыыстан “сакааска оҥороҕун дуо?”, “үөрэх ыытыаҥ дуо?” диэн ыйытыыларынан кутан кэбиспит. Онуоха Айна сториһыгар кэпсээбитинэн, бакаа сүрүн үлэтиттэн ордубат буолан, сакааска оҥорбот, маастар-кылаас ыыппат эбит. Арай, баҕар, хаһан эмит… Хантан үөрэммитин олус интэриэһиргээн ыйыталларыгар, ютубтан көрөн үөрэнэбин диэн хоруйдуур.
Маннык кинигэ хаҕын саҥардан, тупсаран биэрии – аан дойдуга номнуо биллэр, аатырар “букбиндинг” диэн ааттанар ньыма эбит. Таайдахха, Сахабыт сиригэр бу курдук интэриэһинэй уонна наадалаах дьарыгы баһылаабыт бастакы киһинэн биир дойдулаахпыт Айна Попова буолар курдук.
Кыыспытыгар Айнаҕа ситиһиилэри баҕаран туран, өссө да маннык киһи хараҕын үөрдэр, сүргэтин көтөҕөр үлэлэргинэн үллэстэ тур диэн көрдөһөбүт.
Марианна Поскачина,
Леонид Попов аатынан киин бибилэтиэкэ библиография уонна
кыраайы үөрэтэр салаа үлэһитэ