Эдуард Филиппов баһылыктаах Сунтаар нэһилиэгин дьаһалтата уонна Ангелина Антонова салайааччылаах Сунтаардааҕы оҕо дьоҕуран сайыннарар киин сылын аайы дьиэ кэргэттэр кыттыылаах саахымакка, дуобакка турниры тэрийэн ыыталлар. Быйылгы турнир Арассыыйаҕа Дьиэ кэргэн, өрөспүүбүлүкэбитигэр Оҕо саас сылларын чэрчилэринэн ыытылынна.
Уопсайа саахымакка 8, дуобакка 14 дьиэ кэргэн кытынна. Дуобакка икки бөлөҕүнэн оонньуу буолла. Алын сүһүөх кылаастарга үөрэнэр оҕолордоох төрөппүт, иккискэ улахан кылаас үөрэнээччилэрдээх бөлөхтөр диэн. Турнирга оҕолорун кытары ийэлэр, аҕалар, сорохторго эбэлэрэ, таайдара кэлэн көхтөөхтүк кытыннылар. Оҕолор төрөппүттэрин кытары биир хамаанда буолбуттарыттан өссө ордук эппиэтинэс сүктүлэр, кинилэр дьонноро оҕолорун өй, толкуй оонньуутугар көҕүлээтилэр.
Ол курдук, кыра кылааска үөрэнэр оҕолордоох оонньооччулар ортолоругар: 1 м.- Тимур, Василий Уаровтар, 2 м. — Күндүмэн, Марианна Григорьевтар, 3 м. — Байдам, Алена Ксенофонтовтар. Улаханнарга: 1 м. — Айыына, Алексей Григорьевтар, 2 м. — Эрчим Чойнов уонна Иван Попов, 3 м. — Камилла, Гаврил Ефремовтар буоллулар. Кыайыылаахтар спонсордар туруорбут сыаналаах бириистэринэн бэлиэтэннилэр.
Оттон саахымакка бастакы миэстэни Софроновтар (Света, Нелли Александровна) хамаандалар ылла уонна Сунтаар улууһун саахымакка федерацията туруорбут бирииһин – 4 тыһ. солк. суумаҕа сэртипикээтин туттулар. Григорьевтар (Уран, Люция Прокопьевна) үрүҥ көмүс мэтээл хаһаайыннара буолан, Сунтаар нэһилиэгин сыаналаах бирииһинэн наҕараадаланнылар. Үһүс миэстэни ылбыт Айыына, Алексей Прокопьевич Григорьевтар эмиэ олохтоох дьаһалта бирииһинэн бэлиэтэннилэр.
Ону сэргэ кыайыылаахтарга грамота, мэтээл уонна турнирга кыттыбыт бары хамаандалар бары бириис туттулар.
Быйылгы дьиэ кэргэнинэн оонньууга спонсордаабыт олохтоох дьаһалтаҕа (Эдуард Филиппов), улуус саахымакка федерациятыгар (Ксения Семенова), бэтэрээннэр улуустааҕы сэбиэттэригэр (Афанасий Васильев), оҕо дьоҕурун сайыннарар кииҥҥэ (Ангелина Антонова) турнир кыттааччылара, тэрийээччилэр махтаналлар.
Бу күннэҕи турниры Георгий Николаев, Марианна Григорьева судьуйалаан ыыттылар.
Яина ВЛАСЬЕВА