Комментатор чуор куолаһа сарсыҥҥыттан ол эбэтэр ахсынньы 19 күнүттэн 21 күнүгэр диэри А.И.Иванов аатынан Олимпийскай эрэллэри бэлэмниир спортивнай оскуола манеһыгар дуорайыа.
Ол курдук, Сунтаар улууһун боксаҕа федерациятын, улуустааҕы успуорт отделын, А.И. Иванов аатынан спортивнай оскуола боксаҕа тириэньэрдэрин уонна Тойбохой нэһилиэгин дьаһалтатын тэрийиилэринэн буоксаҕа оҕолорго 3 күннээх өрөспүүбүлүкэтээҕи турнир ыытыллар.
Бүгүн Ньурба, Бүлүү, Өлөөн улуустарыттан, Дьокуускай куораттан уонна «Панчер» бокса кулуубуттан турнирга кыттаары анаан-минээн ох курдук оҥостон, кустук курдук куоһанан айаннаан кэллилэр.
Өрөспүүбүлүкэ таһымнаах турнир Сунтаар улууһугар успуорт бу көрүҥэ тэриллэн үлэлээбитэ 65 сылыгар уонна бу турнир буолар күнүгэр, ахсыннеьы 20 күнүгэр, 90 сааһын туолар Яков Васильев уонна кини буоксаҕа дьарыктаабыт иитиллээччитэ Евгений Яковлев кэриэһигэр ананар.
Яков Афанасьевич 53 сыл усталаах туоратыгар физкультура учууталынан үлэлээбитэ. Талан ылбыт идэтинэн 80 сааһыгар диэри таһаарыылаах үлэлээн баран, билигин бочуоттаах сынньалаҥҥа олорор. Сааһырдым диэн таах олорбот кырдьаҕас. Улууска успуорт сайдыытыгар ис сүрэҕиттэн ыалдьар, наада буоллаҕына сүбэ-соргу биэрэр бэтэрээн спортсменнарбытыттан биирдэстэрэ буолар.
Кини уопсастыбаннай тириэньэр быһыытынан оскуола үөрэнээччилэрин, үлэһит ыччаты тустууга, чэпчэки атлетикаҕа, боксаҕа, дуобакка, хаамыскаҕа, хабылыкка утумнаахтык дьрыктаабыта. Ол түмүгэр киниэхэ эрчиллэр оҕолор улуус, өрөспүүбүлүкэ таһымнаах күрэхтэһиилэргэ элбэхтик кытталлара, бочуоттаах миэстэлэри ылаллар. Яков Афанасьевич тэрийэн ыытар спортивнай секциятыгар дьарыктаммыт орҕолортон, ыччаттан кикбоксиҥҥа норуоттар икки ардыларынааҕы кылаастаах успуорт маастара, көҥүл тустууга маастарга 7 кандидат, 7 маастар үүнэн тахсыбыттара. Ону сэргэ буоксаҕа успуорт икки маастара, 14 маастарга хандьыдаат, оҕунан ытыыга 1 маастар, чэпчэки атлетикаҕа 1 маастар, 1 маастарга хандьыдаат, дуобакка 1 маастар, 5 маастарга хандьыдаат бааллар. Дьэ бу курдук, ааттыы турдахха, Яков Афанасьевичка дьарыктаммыт ыччат, оҕо элбэх.
Олортон биирдэстэрэ Евгений Яковлев буолар. Евгений Борисович 1949 с. Тойбохой нэһилиэгэр төрөөбүт. Успуорка олох кыра сааһыттан сыстаҕас этэ. Ордук көҥүл тустуунан, сүүрүүнэн, баскетболунан, волейболунан утумнаахтык дьарыктаммыта. Оттон буокса көрүҥэр киниэхэ бастакы тириэньэрэ Яков Афанасьевич буолар. Буоксаҕа Евгений ситиһиилэриттэн ылан билиһиннэрэр буоллахха манныктар: 1967, 1975 сс. өрөспүүбүлүкэҕэ бириистээх миэстэлэри ылбыта. 1968 с. – оройуон таһымнаах күрэхтэһиигэ бастакы миэстэни ылары ситиспитэ. 1969 с. «Урожай» уопсастыбыта тэрийэн ыыппыт буоксаҕа күрэхтэһиитигэр 54 киилэ ыйааһыҥҥа өрөспүүбүлүкэ чөмпүйүөнэ, 1971 с. – Бүлүү зонатыгар ыытыллыбыт күрэхтэһиигэ 547 киилэ ыйааһыҥҥа чөмпүйүөн, 1972 с. – чөмпүйүөн. Бу курдук Евгений боксаҕа эрэ буолбакка, ити үөһэ ахтан ааспыт успорт көрүҥнэрбитигэр оскуолаҕа үөрэнэ сылдьан да, үлэһит да буолан баран араас таһымнаах күрэхтэһиилэргэ төрөөбүт оройуонун аатын чиэстээхтик көмүскээбитэ.
Ахсынньы 19-21 күнэригэр ыытыллар өрөспүүбүлүкэтээҕи турнирга эдэр боксердар уопсайа 35 киилэҕэ киирсиэхтэрэ. Ол курдук, 2014-2015 сс. төрүөх уолаттар 28, 32, 34, 36, 40, 48 кг ыйааһыҥҥа, 2011-2012 сыллаахтар 30, 34, 36, 42, 44, 50 , 52, 54 ыйааһыҥҥа, 2009-2010 сыллаах уолаттар 38, 42, 44, 46, 48, 50, 52, 54, 57, 60, 63 киилэҕэ киирсиэхтэрэ. 2008-2007 сыллаах уолаттар 50, 54, 57, 60, 70, 80 уонна 80-тан үөһээ ыйааһыҥҥа, 2009-2011 сыллаах кыргыттар 57, 6, 64 киилэҕэ күөн көрсүөхтэрэ.
Онон сарсын успуорт бу көрүҥүн сэргээччилэр манежка баран хас да улуус эдэр боксердарын киирсиилэрин көрүҥ. Сарсыарда 11 чаастан күрэхтэһии саҕаланар, турнир үөрүүлээх аһыллыыта күнүс 2 чаастан буолуоҕа.
Ону таһынан биһиги биир киэн туттар уолбут, бу соторутааҕыта Дьокуускай куоракка буолбут «Вызов Севера» турнир кыайыылааҕа Михаил Варламов ыҥырыылаах ыалдьыт быһыытынан сылдьыаҕа.
Яина ВЛАСЬЕВА