Бэҕэһээ, тохсунньу 28 күнүгэр, Сунтаар 3-с №-дээх оскуолатыгар «Путь к успеху!» эдэр учууталлар куоҥкурустара үрдүк таһымҥа буолан ааста. Талааннаах уонна кэскиллээх учууталлары арыйыыга уонна өйөөһүҥҥэ туһуламмыт куоҥкурус быйыл улууспут араас үөрэх тэрилтэлэриттэн 12 кыттааччыны түмтэ.
Учууталлар үс түһүмэҕи аастылар: аһаҕас уруокка үөрэнээччилэри кытта хардарыта алтыһыы уонна аныгы үөрэх технологияларын туһаныы үөрүйэхтэрин көрдөрдүлэр. Иккис түһүмэх – бэйэлэрин билиһиннэрэн, талааннарын арыйдылар. Үсүһүнэн аһаҕас кэпсэтии буолла – аныгы педагог иннигэр тирээн турар суолталаах кыһалҕалары дьүүллэстилэр. Бу учууталлар санааларын истэргэ дьоһуннаах былаһаакка буолла.
Экспертэр истэригэр уопуттаах педагогтар, Сунтаар улууһун ыччат бэлиитикэтин уонна үөрэх салалтатын бэрэстэбиитэллэрэ, үөрэх үлэһиттэрин профсоюһун бэрэссэдээтэлэ киирдилэр.
Ол курдук, «Путь к успеху!» куоҥкурус кыайыылаахтарын уонна призердарын ааттара:
3-с истиэпэннээх дипломант буолла – Станислав Ноговицын, Л. Попов аатынан Арыылаах агро хайысхалаах оскуола информатикаҕа учуутала.
2-с истиэпэннээх дипломант – Аина Бекянова, А.П. Павлов аатынан Сунтаар 1-кы №-дээх оскуола биологияҕа уонна географияҕа учуутала.
1-кы истиэпэннээх дипломант – Елена Олесова, Сунтаардааҕы анал коррекционнай оскуола учуутала.
Кыйыылаах үрдүк аатын ылла – Мария Слепцова, Сунтаардааҕы гимназия нуучча тылын уонна литературатын учуутала.
Ону тэҥэ анал ааттар бэлиэтэннилэр:
«Педагогический дебют» анал аат – Алина Корякина, Бүлүүчээн лиссиэйин ИЗО-ҕа учуутала.
«Творческое вдохновение» анал аат – Иван Иванов, П.Х.Староватов аатынан Элгээйи орто оскуолатын үлэ учуутала.
«Путь к совершенству» анал аат – Эльмира Надык, Сунтаардааҕы лиссиэй нуучча тылын уонна литературатын учуутала.
Куоҥкурус кыайыылаахтара уонна призердара дипломунан уонна бирииһинэн наҕараадаланнылар. Ону таһынан, Мария Слепцова үөрэх үлэһиттэрин профсоюһуттан алта тыһыынчалаах туоһу суругу тутта.
Үөрэх салалтатын аатыттан бары кыттааччыларга, дьүүллүүр сүбэ чилиэннэригэр уонна тэрийээччилэргэ барҕа махталбытын тириэрдэбит. Эдэр учууталларбыт үөрэх сайдыытыгар боччумнаах кылааттарын киллэриэхтэрэ диэн эрэнэбит.
Сунтаардааҕы үөрэҕирии управлениетын пресс-сулууспата