Сунтаардааҕы профилактика отделениета Арассыыйаҕа — Дьиэ кэргэн, өрөспүүбүлүкэҕэ — Оҕо саас, Сунтаар улууһугар — Аҕам саастаахтар сылларын чэрчитинэн дьиэ кэргэн дэкээдэтин тэрийэн ыытта.
Дэкээдэ ыам ыйыттан саҕалаан бэс ыйыгар диэри ыытылынна. Манна профилактика отделениетын исписэлиистэрэ араас хабааннах тэрээһиннэри тэрийэн ыыттылар. Ол курдук үгэскэ кубулуйбут сылын аайы ыытыллар сайыны көрсүү бырааһынньыга олус сэргэхтик ааста. Ыаллар тоҕуоруһа мустан «Чохулаах» сиригэр-уотугар аралдьыйан, оҕолор оонньоон-көрүлээн дуоһуйа сынньанан, сэниэ-күүс эбинэн тарҕастылар. Бу тэрээһин ыытылларыгар Сунтаарбыт нэһилиэгин баһылыга Эдуард Филиппов массыынанан ыаллары илдьэн-аҕалан улахан өйөбүл буолла.
Биһиги тэрилтэбит оҕо көмүскэлин күнүгэр былаһаакка тэрийэн көрдөөх оонньуулары оонньоон, кырачааннар хаартыскаҕа хатаналларыгар анаан фотозона тэрийэн үлэлэппитэ. Хас биирдии былаһааккаҕа кыттыбыт оҕолор илии тутуурдаах баралларыгар күүс-көмө, өйөбүл буолбут Сунтаарбыт урбаанньыттарыгар «Татыйыына» (Н.П. Герасимова) холбоһуктаах хампаанньатыгар, «Сайдам» (Павлова М.С.) , «Харандаас» (Оконешникова Л.А.) , «Виктория» (Герасимова Е.В) маҕаһыыҥҥа махталбытын тириэрдэбит.
Хас биирдии дьиэ кэргэҥҥэ эркин курдук эрэнэр, дурда-хахха буолар аҕаларбыт буолаллар. Манан сиэттэрэн Сунтаардааҕы Аҕа түмсүүтүн бэрэссэдээтэлэ Борис Уларов, түмсүү чилиэнэ Константин Рожин уонна «Сомоҕо» ТОС бэрэссэдээтэлэ Константин Тотонов аҕалары кытары көрсүһүүгэ кэлэн атах тэпсэн олорон ирэ-хоро кэпсэттилэр.
Ону тэҥэ, психологическай трениннар, маастар кылаастар эмиэ үрдүк таһымҥа ыытылыннылар. Отделение мантан да атын дьиэ кэргэни, оҕону өйүүр сыаллаах үлэтэ-хамнаһа үгүс.
Валентина АРХИПОВА