Дьокуускайга Саха сирин дьахталларын «Подруги – Дьүөгэлэр» аһаҕас форумнара буолан ааста. Форум өрөспүүбүлүкэ дьахталларын социальнай көхтөрүн үрдэтиигэ, бииргэ үлэлээһиҥҥэ, олохторун-дьаһахтарын хаачыстыбатын тупсарыыга, көмөлөһүүгэ туһуланна. Бырайыак «Биир ньыгыл Арассыыйа» баартыйа Саха сиринээҕи Сэбиэтин мунньаҕар өйөммүтэ. Форум хас да хайысханы ситимниир: «Ийэлэр үлэлэрэ», «Дьахтар университета», «Дьахтар доруобуйата», «Эдэр Саха сирэ», «Дьахтар экэниэмикэтэ», «Оскуолаҕа дьахтар бэлиитикэтэ», «Эппиэтинэстээх төрөппүт оскуолата», о.д.а.
Бу тэрээһиҥҥэ биһиги улууспутуттан хас да буолан баран кытыннылар.
«Форумҥа 2019-2023 сс. ыытыллыбыт үлэлэр тустарынан иһитиннэрдилэр, санаа үллэһиннилэр. Ону сэргэ, биллэн турар, дойдубут бэрэсидьиэнэ Владимир Путин көҕүлүүр национальнай бырайыактарынан үлэ туолуутугар, дьиэ кэргэн олоҕо тупсуутугар, оҕо доруобуйатын тула киэҥ кэпсэтии буолла. Дэлэгээттэр национальнай бырайыактары олоххо киллэриигэ, Саха сирин улуустарын уонна оройуоннарын сайдыытыгар, ону тэҥэ Саха сирин дьахталларыгар уонна нэһилиэнньэтигэр аһаҕас ыҥырыы оҥордулар», – диэн бу тэрээһиҥҥэ кыттыыны ылбыт дэлэгээт, улуус дьаһалтатын социальнай уонна имидж политикатыгар исписэлииһэ Тамара Иванова иһитиннэрдэ.
Бу улахан тэрээһиҥҥэ улуус, өрөспүүбүлүкэ экономическай-социальнай сайдыытыгар кылааттарын иһин «Арчы» элбэх оҕолоох ыал кулуубун салайааччыта Наталья Иванова уонна Сунтаардааҕы санаторнай оскуола-интэринээт дириэктэрэ Мария Бекренева СӨ судаарыстыбаннай мунньаҕын (Ил Түмэнин) Бочуотунай грамотатынан наҕараадаланнылар.
Яина ВЛАСЬЕВА