Оҕо сааспытыгар түһэн ыллыбыт
Кыһыл хаалтыс доҕордоох,
Горн, барабаан аргыстаах,
«Бэлэм буол! Мэлдьи бэлэммин!»
Ыҥырар-угуйар тыллардаах
Оҕо сааспыт сырдык ырата — пионерия.
Олунньу 17 күнэ — Саха сиригэр пионерскай тэрилтэ төрүттэммитэ 100 сыла. Бу үөрүүлээх үбүлүөйүнэн Н.М. Родионова аатынан Сунтаардааҕы оҕо дьоҕурун сайыннарар киин А. П. Павлов аатынан Сунтаар 1 оскуолатыгар буолбут Бүлүү бөлөх улуустарын I педагогическай марафоннарыгар бэрт сэргэх тэрээһини ыыттыбыт. Ол курдук, пионерскай маршруттарынан этэрээттэргэ хайдах ким үҥкүүлээн, оонньоон, ыллаан, ким пионерскай хаалтыһы баайарга үөрэнэн, билиилэрин тургутан оҕо саас үөрүүтүн биллилэр. Пионерскай уонна билиҥҥи оҕо тэрилтэлэрин историятын билиһиннэрэр быыстапканы кииммит дириэктэрэ Ангелина Антонова кэрэхсэбиллээхтик кэпсээтэ.
Бэтэрээн учууталлардыын көрсүһэн, тэбис-тэҥҥэ оонньоон-көрүлээн, ыллаан-үҥкүүлээн пионер сааспытын санаатыбыт, история биир кэрдиис кэмигэр сүгүрүйдүбүт.
Айна ЯКОВЛЕВА