Бэҕэһээ Сунтаар улууһун үөрэҕин үлэһиттэрин Олунньутааҕы сүбэ мунньаҕа «Проблемы и перспективы развития муниципальной системы образования» диэн темалаах Сунтаар А.П. Павлов аатынан 1 нүөмэрдээх оскуолатыгар ыытылынна.
Бастатан туран, мунньах кыттыылаахтарын улуус баһылыга Анатолий Григорьев эҕэрдэлээтэ. Ол кэннэ үөрэх салалтатын салайааччыта Альберт Иванов сүрүн дакылааты оҥордо. Үөрэх эйгэтигэр тирээн турар кыһалҕалары сырдатта. Каадыр тиийбэтин уонна оҕо саадтарын хааччыйыыга ураты болҕомто ууруллуохтааҕын бэлиэтээтэ. Ону сэргэ бу хайысхаҕа үлэлии сылдьар педагогтарга анал сэминээрдэри ыытыы суолтаталааҕын тоһоҕолоото.
Алексей Иванов, уопсай үөрэхтээһин отделын салайааччыта, «Подготовка к ГИА» тиэмэни таарыйда. Быйыл 376 оҕо БКЭ туттарыахтара. Ону таһынан Алексей Иннокентьевич «Азия о5олоро» норуоттар икки ардыларынааҕы успуорт оонньууларыгар уонна үөрэнээччилэр спартакиадаларыгар барар оҕолор биир кэлим эксээмэннэрин эрдэ туттаралларын хааччыйыыны бэлэмнээһин дьоһуннаах сорук буоларын эттэ.
Александра Васильева, иитии уонна эбии үөрэхтээһин отделын сэбиэдиссэйэ, «Основные аспекты воспитания: перспективы развития» диэн тиэмэлээх дакылаатын билиһиннэрдэ. Оскуолаларга театрдар уонна музейдар аһыллыбыттарын иһитиннэрдэ. Александра Алексеевна успуорт саалалар тиийбэттэрэ биир тирээн турар кыһалҕа буоларын биллэрдэ.
Ону тэҥэ Захарова Нина, Сунтаардааҕы политехническай лиссиэй 10-с кылааһын үөрэнээччитэ, бүтүн Арассыыйатааҕы оҕолор иккис сийиэстэригэр баран кыттан кэлбитин кэпсээтэ. Салгыы Ангелина Антонова, М.Родионова аатынан оҕо дьоҕурун сайыннарар киин сэбиэдиссэйэ, МОЦ (муниципальнай опорнай центр) хамсааһын үлэтин билиһиннэрдэ. Альбина Прокопьева, Тойбохойдооҕу детдом профилактика отделын салайааччыта, оҕо иитиитин туһунан кэпсээтэ.
Ити курдук, олунньутааҕы Сунтаар улууһун үөрэҕин үлэһиттэрин сүбэ мунньаҕын пленарнай чааһыгар муниципальнай тэриллии кыһалҕаларын уонна кэскиллэрин кытта сибээстээх араас аспектары дьүүллэстилэр.
Мунньах бүтүүтэ Сунтаар улууһун үөрэҕин сайдыытыгар тус кылааттарын, өр сыллаах үрдүк таһаарыылаах үлэлэрин иһин ытык дьоммутун наҕараадалааһын үөрүүлээх сиэрэ-туома ыытылынна. Кинилэр ситиһиилэрэ бэлиэтэннэ. Ону таһынан, өр сылларга үөрэх салалтатыгар үлэлээбит Екатерина Попованы бочуоттаах сынньалаҥҥа атаарыы тэрээһинэ буолла. Екатерина Попова — үтүө суобастаах үлэһиттэртэн биирдэстэрэ. Бүгүн кини үлэтин-хамнаһын, ситиһиилэрин бэлиэтиибит уонна инники кэскилбит өссө үрдүк үөрүүнү, саҥа кыахтары аҕалыа диэн эрэнэбит.
Күн иккис аҥаарыгар үөрэх салаатын үлэһиттэрин Олунньутааҕы мунньаҕын чэрчитинэн сиэссийэлэр үс былаһааканан арахсан ыытылыннылар. Манна педагогтар түмсэн, инники соруктарын торумнастылар, сүрүн боппуруостары быһаарыстылар.
Сунтаар улууһун үөрэҕириигэ салалтатын пресс-сулууспата.