Олунньу 14 күнэ – Аан дойдуга кинигэ бэлэхтээһин күнэ. Бүгүн 3-с №-дээх оскуолаҕа 4-с кылаас оҕолоругар (сал.С. Р.Мыреева) оскуола бибилэтиэкэтин тэрийиитинэн «Остуоруйа дойдутугар айан» квиз-оонньуу ыытта.
Оҕолор ким-ханнык остуоруйаны сөбүлээн аахпыттарын үллэһиннилэр. Бастакы түһүмэххэ «Остуоруйаларынан биктэриинэ» ыйытыктарыгар кырачааннар көрдөөхтүк эппиэттээн, остуоруйалары үчүгэйдик билэллэрин көрдөрдүлэр. Онтон нуучча норуотун «Эриэппэ» остуоруйатын оруолларынан бэркэ оонньоотулар.
«Таайыҥ, бу ханнык остуоруйаттан малый? «- диэн түһүмэххэ бибилэтиэкэр дуоскаҕа уруһуйдаабыт биридимиэттэрин тута таайан истилэр. «Остуоруйа дьоруойдара» ойууларынан таайбараҥҥа оҕолор Кощей Бессмертнай, Дьэгэ Бааба, Буратино, Кыһыл Бэргэһэчээн, Дюймовочка уо. д.а. билэр уобарастарын көрөн үөрдүлэр.
Бу көрсүһүүгэ оҕолор бибилэтиэкэҕэ кинигэ бэлэхтээбиттэрэ соһуччу үөрүү буолла. Ол курдук, 5-с кылаас үөрэнээччилэрэ (сал. А. А.Алексеева ) бу бэлиэ күнүнэн оскуола бибилэтиэкэтигэр кинигэ бэлэхтээбиттэрэ, оҕо сынньалаҥар ааҕар кинигэтин пуондата кэҥииригэр саҕалааһынынан буолуо.
Дьокуускайтан Ф.И.Авдеева аатынан Оҕо айар-тутар дыбарыаһын педагог-тэрийээччитэ 3-с N-дээх оскуоланы бүтэрбит Ольга Петрова төрөөбүт дойдутугар кэлэн, оҕолорго суолга сэрэхтээх буолуу үөрэхтэрин ыыта сылдьар. Кини «Лаборатория безопасности» ПМК-лары кытары үлэлэһэр кэмигэр, үөрэммит оскуолатын бибилэтиэкэтигэр анал хомуурунньук, блокнот, уруучука бэлэхтээтэ.
Лидия СЕМЕНОВА, 3 №-дээх оскуола педагог-бибилэтиэкэрэ