Муус устар 18 күнүгэр, Элгээйи нэһилиэгэр, быйыл оскуоланы бүтэрэр выпускниктарга анаан С. А. Зверев — Кыыл Уолун аатынан Фольклор түмэлигэр үгэскэ киирбит алгыс сиэрэ-туома ыытылынна. Тэрээһини түмэл салайааччыта Ксения Семенова уонна алгысчыт Анастасия Михайлова иилээн-саҕалаан ыыттылар.
Выпускниктары алгыстаах алаадьынан, сырдьыгынас кымыһынан айах туттулар, саха сиэринэн оһуокайдаатылар, «Тоҕус мэҥэ хамнаныы» сиэрин толордулар, төрөппүттэрэ бэлэмнээбит харысхалларын иилиннилэр. Оскуоланы бүтэрээччи оҕолорбут маҥнайгы дьоһун тургутууларын этэҥҥэ ааһан олох киэҥ аартыгар эрэллээхтик үктэнэллэригэр санаалара бөҕөргөөтө.
Сылын аайы бу тэрээһини үрдүк таһымҥа ыытар С. А. Зверев — Кыыл Уолун аатынан Фольклор түмэлин коллективыгар барҕа махталбытын биллэрэбит!
П.Х. Староватов аатынан Элгээйи орто оскуолатын коллектива