Сунтаар улууһун баһылыгын Ороһооспотооҕу харыйатыгар араас хайысхаҕа үчүгэй көрдөрүүлээх, уопсастыбаннай үлэҕэ көхтөөх, ситиһиилээх, бастыҥ үөрэнээччилэр сылын ахсын түмсэллэр.
Ол курдук, быйылгы харыйаҕа улуус бары оскуолаларыттан 102 оҕо, С.А. Зверев – Кыыл Уолун аатынан улуустааҕы норуот айымньытын киинигэр муһуннулар. Киэҥ уораҕайга үөрэн мичилиспит, мааны таҥастаах оҕолор саҥалара, күлүүлэрэ бырааһынньыктыы киэркэйбит сааланы биирдэ толорон кэбистэ. Тэрийээччилэр кинилэри көрдөөх-нардаах оонньууга, араас маастар-кылаастарга угуйдулар.
Салгыы, «Былааһы кытта кэпсэтии» түһүмэххэ икки былаһаакканан тарҕаһан, тэрилтэ салайааччыларын кытары аһаҕас, дьылабыай сэһэргэһиигэ кыттыстылар. Манна оҕолор сүрдээх көхтөөхтүк, олус интэриэһинэй ыйытыктары, бэйэлэрин көрүүлэрин, баҕа санааларын эттилэр. Ол курдук, кинилэр ыйытар боппуруостара маннык буолла: аҕам саастаахтарга ытыктабыл сылыгар туох ыарахаттары көрүстүгүт?, нэһилиэк иһинэн ааһар федеральнай суолга тротуар тоҕо суоҕуй?, араас тэрээһиннэргэ, күрэхтэргэ оҕолор кыттааһыннара, ситиһиилэрэ хайдаҕый?, быйылгы С.А. Зверев — Кыыл Уола сылыгар, хайдах салайааччы буола үүнүөххэ сөбүн туһунан уо.д.а. Маны сэргэ, оҕолор да салайааччылар да сүрүн баҕарар баҕа санаалара – Эйэ олохтонуута. Сэһэргэһии түмүгэр, саамай көхтөөх оҕолору бэлиэтии көрөн сэмэй бэлэхтэри туттардылар.
Салгыы, кэнсиэртиир саалаҕа Сунтаардааҕы оҕо искусствотын оскуолата туруорбут «Үтүө санаалаах Мэхээлэ уол» мюзикл-остуоруйаны сэҥээрэ көрдүлэр. Үөрүүлээх тэрээһиҥҥэ кыттар чиэскэ тиксибит оҕолору улууспут баһылыга Анатолий Григорьев эҕэрдэлээтэ уонна бэлэхтэрин туттарда. Улуус инники кэскиллэрэ, эрэллэрэ үөрэхтээх, үтүө майгылаах, дойдуларыгар бэриниилээх дьон буолалларыгар баҕа санаатын эттэ.
Ороһооспотооҕу харыйа хас биирдии оҕо өйүгэр-санаатыгар үтүө өйдөбүл, умнуллубат түгэн буолан хаалара саарбаҕа суох.
Елизавета ТИТОВА