СӨ Бырабыыталыстыбатын 2024 сыллааҕы үлэ түмүгүнэн отчуота Сунтаар улууһугар олунньу 11 күнүттэн саҕаланыаҕа. Ол курдук, бырабыыталыстыба бөлөҕүн биһиги улууспутугар СӨ Бырабыыталыстыбатын бэрэссэдээтэлин солбуйааччы Георгий Степанов салайан кэлиэҕэ. Отчуоту туруорар дэлэгээссийэ үс бөлөҕүнэн арахсан, улуус бары нэһилиэктэринэн сылдьыаҕа. Манна толоруулаах былаас уорганнарын бэрэстэбиитэллэрин сэргэ, биһиги улууспут дьаһалтата, тэрилтэ салайааччылара сылдьыахтара.
Бырабыыталыстыба бэрэссэдээтэлин солбуйааччы Георгий Степанов салайар бастакы бөлөҕө Туойдаах, Хадан, Дьаархан, Маар Күөл, Уһун Күөл, Түбэй, Түбэй Дьаархан, Сиэйэ нэһилиэктэригэр отчуоту туруоруоҕа. Оттон СӨ Доруобуйа харыстабылын миниистирин бастакы солбуйааччы Дмитрий Сергин салайааччылаах бөлөх Толоон, Күүкэй, Бүлүүчээн, Наахара, Кириэстээх, Куокуну, Тойбохой, Аллыҥа, Кутана нэһилиэктэригэр сылдьыахтара. Үһүс бөлөҕү СӨ Үбүн миниистирин эбээһинэһин толорооччу Иван Алексеев салайан илдьэ сылдьыаҕа. Бу бөлөх Хоро, Элгээйи, Күндэйэ, Устье, Кэмпэндээйи, Тэҥкэ, Бордоҥ, Илимниир нэһилиэктэригэр отчуоттуохтара. Оттон олунньу 14 күнүгэр улуус киинигэр үлэлиэхтэрэ. Туспа былаанынан биирдиилээн дьону көрсүөхтэрэ уонна Сунтаар нэһилиэгэр отчуоту туруоруохтара.
Манна даҕатын эттэххэ, бу ааспыт ый түмүгүнэн СӨ Ил Дархана Айсен Николаев «Якутия, вперед» биэриигэ тохсунньу ыйдааҕы үлэ түмүктэрин таһаарбыта, ону сэргэ Бырабыыталыстыба отчуоттарын нэһилиэнньэни кытта сирэй көрсөн тоҕо ыытар наадалааҕын быһаарбыта. Ол курдук, Айсен Сергеевич: «Мин өрөспүүбүлүкэм олохтоохторуттан, ордук ыраах сытар нэһилиэнньэлээх пууннартан, элбэх этии киирэрин истэбин, хомуйабын. Бу биһиги инһики үлэбитигэр тирэх буолар. Маннык отчуоттарга дьон салайааччыларга тус кыһалҕаларын этинэллэригэр кыах биэрэр. Бырабыыталыстыба чилиэттэригэр бу эмиэ олус наадалаах, тоҕо диэтэххэ дьону-сэргэни истэргэ үөрэтэр. Хас биирдии киирбит этии Бырабыыталыстыба үлэтигэр учуоттанар» диэбитэ.
Яина ВЛАСЬЕВА