Ааспыт сылга Арассыыйаҕа биллэриллибит Педагог уонна Аҕа сүбэһит сылын түмүктээн Сунтаар олохтоох дьаһалтата бэҕэһээ нэһилиэк оскуолаларын, технологическай колледж педагогтарын, бэтэрээн учууталлларын чиэстээтэ.
Учууталлар, наставниктар мустан бу күн Сунтаар нэһилиэгэ инники сайдыытыгар бэйэлэрин санааларын көрүүлэрин эттилэр, инникитин да бииргэ үлэлииргэ бэлэмнэрин биллэрдилэр.
Нэһилиэк баһылыга Эдуард Филиппов учууталларга истиҥ эҕэрдэтин эттэ уонна наҕараадалары туттартаата. Наҕараадалааһын быыһыгар оскуола кэлэктииптэрэ, үөрэнээччилэр музыкальнай эҕэрдэлэрин биир идэлээхтэригэр, учууталларыгар тириэртилэр.
Маннык эмиэ тэрээһин бүгүн уһуйааннар иитээччилэригэр ыытылынна.
Бу икки күн ыытыллыбыт тэрээһин үрдүк таһымҥа барбытын сылдьыбыт барыта эрэ бэлиэтээтэ. Оҕону иитиигэ, үөрэтиигэ билиилэрин, санааларын ууран үлэлээбит бэтэрээн педагогтар, аҕам саастаах наставниктар үүнэр көлүөнэ үөрэхтээх, үрдүк култууралаах буолан улуустарыгар, дойдуларыгар туһа дьон буолалларыгар инникитин да бары түмсэн биир сүбэ буолан үлэлииргэ диэн санааларын эттилэр, тэрийээччилэргэ махталларын биллэрдилэр.
Яина ВЛАСЬЕВА
Георгий АФАНАСЬЕВ хаартыскаҕа түһэриилэрэ