Бүгүн, ахсынньы 20 күнүгэр, Сунтаар улууһун, Тойбохой нэһилиэгин Бочуоттаах олохтооҕо, РСФСР норуотун үөрэҕириитин туйгуна, элбэх оҕону, ыччаты успуорт  хас да көрүҥэр уһуйбут, дьарыктаабыт успуорт бэтэрээнэ, 53 сыл устата физкультура учууталынан үлэлээбит Яков Васильев  быйыл Арассыыйаҕа Дьиэ кэргэн сылыгар икки оҕом миэхэ сүрдээх үчүгэй бэлэх оҥордулар диэн үөрүүтүн үллэстэр.

Дьокуускай куоракка олорор, үлэлиир кыыһым Наталия Васильева «Почетный архитектор Якутии» буолла.  Бу наҕараада Саха сиригэр, Сунтаар улууһугар сэдэх соҕус буолуо. Оттон уолум   Петр Яковлевич  Сунтаарга «Лесохрана» тэрилтэтигэр суоппардыыр.  Петр эмиэ  бу ыйга наҕараада туппута. Онон  икки оҕо биир 90 сааспар улахан бэлэх оҥордулар.

Петрым 1967 с., Наталиям 1969 с. Уус Алдан оройуонун Танда  сэлиэнньэтигэр төрөөбүттэрэ. Оскуоланы Тойбохойго бүтэрбиттэрэ. Наташа 10-с кылаас кэнниттэн Нам училищетыгар дизайнер идэтигэр үөрэнэр. Үөрэҕин кэнниттэн Тойбохой оскуолатыгар уруһуй, черчение учууталынан үлэлээбитэ. Онтон Красноярскайдааҕы архитектурнай академияҕа архитектор идэтигэр үөрэнэр. Бу идэтинэн Дьокуускай куоракка үлэлии сылдьар.

Оҕолорум ситиһиилэриттэн, кинилэр таһаарыылаах үлэлэриттэн мин, төрөппүт киһи үөрэри кэмэ суох, кинилэринэн киэн туттабын.

Яков ВАСИЛЬЕВ, Сунтаар улууһун, Тойбохой нэһилиэгин Бочуоттаах олохтооҕо,

РСФСР норуотун үөрэҕириитин туйгуна, 53 сыл ыстаастаах физкультура учуутала.

Читайте дальше