Оҕолор успуорт араас көрүҥнэригэр күрэстэстилэр

Ааспыт нэдиэлэҕэ Сунтаарга маассабай успуорду сайыннарар, көҕүлүүр, оҕолору чөл олоххо угуйар сыаллаах ыытыыллыбыт күрэхтэһиилэргэ үөрэнээччилэр көхтөөхтүк кытыннылар.

Гиирэ успуордугар турнир

Ол курдук, Тохсунньу 11 күнүгэр гиирэ успуордугар улуустааҕы аһаҕас турнир буолан ааста. Күрэхтэһиигэ улуус 9 оскуолатыттан 52 оҕо кыттыыны ылла. Күн устата ыытыллыбыт тыҥааһыннаах киирсии түмүгүнэн абсолютнай чөмпүйүөннэр ааттаннылар: уолаттарга – Гаврил Егоров, Устье орто оскуолатын 8-с кылааһын үөрэнээччитэ, кыргыттарга – Уйгулана Потапова, Устье орто оскуолатын 11-с кылааһын үөрэнээччитэ. Кыайыылаахтарга Устье орто оскуолатын аатыттан бэлэхтэр туттарылыннылар.

Волейболга аһаҕас күрэх

Тохсунньу 12 күнүгэр А.Иванов аатынан олимпийскай эрэллэри бэлэмниир оҕо анал оскуолатын манеһыгар 2008-2010 сыллаах төрүөх уолаттарга уонна кыргыттарга «Саха Өрөспүүбүлүкэтигэр успуорт уонна доруобуйа” декадатыгар аналлаах волейболга аһаҕас күрэхтэһии дьону түмтэ. Манна уопсайа 72 оҕо кытынна.
Уопсай түмүк: уолаттарга I м. – Күндэйэ орто оскуолата, II м.– Тойбохой орто оскуолатын уонна Сунтаардааҕы 1-кы нүөмэрдээх оскуола сборнай хамаандата, III м. – Элгээйи куустата. Кыргыттарга I м. – Кириэстээх орто оскуолата, II м. – Куокуну орто оскуолата, III м. – Элгээйи куустата. Ону таһынан уолаттарга “Лучший игрок” номинация кыайыылааҕынан Куокуну орто оскуолатын 10-с кылааһын үөрэнээччитэ Нарияна Григорьева буолла, уолаттарга – Күндэйэ орто оскуолатын 9-с кылааһын үөрэнээччитэ Айаан Лазарев.

Төрүт остуол оонньуулара

Тохсунньу 13 күнүгэр Сунтаардааҕы оҕо спортивнай оскуолатыгар Сунтаар улууһун үөрэнээччилэригэр биирдиилээн уонна хамаанданан бастыыр иһин төрүт остуол оонньууларыгар күрэхтэһии бэрт сэргэхтик буолан ааста. Манна уопсайа улуус 8 оскуолатыттан 50 үөрэнээччи күөн көрүстэ. Хамаанданан түмүк маннык буолла:
I миэстэ – Бордоҥ орто оскуолата (тириэньэр Иванова Д.Н.);
II миэстэ – Күндэйэ орто оскуолата (тириэньэр Макаров М.Н.);
III миэстэ — Сунтаардааҕы политехническай лиссиэй (тириэньэр Матросов Я.В.).
Маны таһынан сыл түмүгүнэн биэс бастыҥ оонньооччу ааттанна: Максимова Алена, Бордоҥ орто оскуолата, Тимофеев Эрхан, Кутана орто оскуолата, Анисимова Нелли, Бордоҥ орто оскуолата, Данилов Дьулустан, Бордоҥ орто оскуолата, Иванов Коля, Кутана орто оскуолата. Бастыҥ оонньооччуларга федерация аатыттан харчынан бириэмийэ туттарылынна. Кыайыылаахтар мэтээллэринэн уонна грамотанан наҕараадаланнылар.

Бу үс күрэхтэһии түмүгүнэн 2024 сылга үөрэнээччилэр спартакиадаларыгар кыттарга сүүмэрдэммит хамаанда талылынна. Оҕолор тэринэн кэлэн, көхтөөх кыттыыны ылбыттара үөрдэр. Спортсменнары, тириэньэрдэри үрдүк көрдөрүүлэринэн эҕэрдэлээн туран, өссө үрдүк ситиһиилэри баҕарабыт. Үөрэнээччилэр успуордунан утумнаахтык дьарыктаналлара, Сунтаарбыт инники кэскилин түстүүр эрэллэрэ буоланнар, улууспут успуордун сайдыытыгар кылааттарын киллэриэхтэрэ диэн эрэнэбит.