Бүгүн, Л.А.Попов аатынан Сунтаардааҕы киин бибилэтиэкэҕэ бүтүн Арассыыйатааҕы оҕо быраабын көмүскүүр күҥҥэ сөп түбэһиннэрэн «Мин быраабым, эбээһинэһим уонна эппиэтинэһим» диэн оскуола үөрэнээччилэригэр бибилэтиэкэ үлэһиттэрэ аһаҕас уруок ыыттылар. Бу күн оҕолор Российскай Федерация уонна дьиэ кэргэн кодексатыгар олоҕуран бэйэлэрин бырааптарын туһунан элбэҕи биллилэр.
Оҕолору кытта көрсүһүүгэ кэлбит ыалдьыттар сүрүн болҕомтолорун үөрэнээччи эбээһинэһин толоруутугар уонна үөрэх тэрилтэтигэр баар быраабылаларга уурдулар. Сүрүннээн оҕолор уопсастыбаннай бэрээдэги кэстэхтэринэ, буруй оҥордохторуна туох миэрэҕэ тардыллыахтарын сөбүн туһунан ыйыталастылар. Сунтаардааҕы ГТАС отделын салайааччыта Анна Григорьева оҕо төрөөбүтүн туһунан туоһу сурук суолтатын сырдатта. Түмүккэ, оҕолор бүгүҥҥү кэпсэтии кэнниттэн бэйэлэрин бырааптарын туһунан чиҥэтэр оонньууга кытыннылар.
Мира АФАНАСЬЕВА