Бүгүн, Сунтаарга доруобуйа харыстабылын үлэһиттэрэ Саха сиригэр педиатрия сулууспата 100 сыла туолбутун бэлиэтээтилэр. Сунтаар улууһугар педиатрия салаата 1942 сыллаахха тэриллибитэ. Бу кэмтэн элбэх күн-дьыл ааста… Сулууспа тэриллиэҕиттэн үрүҥ халааттаах аанньалларбыт: «Оҕо доруобуйатын- инники күөҥҥэ тутуллуохтаах» диэн этиилэрин ыһыктыбакка үлэлии сылдьаллар.
Бэлиэ күҥҥэ сөп түбэһиннэрэн оҕо доруобуйатын харыстабылыгар үлэлиир дьону чиэстээтилэр. Сунтаар улууһун кылаабынай бырааһа Константин Павлов педиатрия сулууспатын үлэһиттэригэр үрдүкү наҕараадалары туттартаата.
Сунтаар улууһун педиатрия сулууспата өрөспүүбүлүкэҕэ үчүгэй үлэлээхтэр ахсааннарыгар киирэр. Ол курдук, сокуоннай саастарын ситэ илик оҕолор доруобуйаларын кэтээн көрүүгэ Сунтаар улууһа инники күөҥҥэ сылдьар. Бу сыл ахсынньы ый түмүгүнэн оҕо доруобуйатын көрүү былаанын 102 % толордулар.
РФ доруобуйатын харыстабылын туйгуна Валентина Иосифовна Саввинова идэтин толору баһылаабыт, баай уопуттаах быраас.
Ону тэҥэ, кини элбэх бырааска үтүө сүбэһит, настаабынньык: “Оҕо бырааһынан 1977 сыллаахха үлэлии кэлбитим. Урукку дьылларга оройуон үрдүнэн икки эрэ оҕо бырааһа баар этэ. Людмила Семеновна Васильева диэн уопуттаах бырааһы кытта иккиэн оройуон оҕолорун доруобуйатын көрөрбүт-истэрбит. Биһиэхэ фельдшердарбыт төһүү күүс буолаллара. Бииргэ үлэлээбит үрдүк таһымнаах медик идэлээх дьоммун Екатерина Ефремовнаны, Мотрена Гаврильевнаны, Августина Ильиничнаны үтүө эрэ тылбынан ахтабын. Урут «Гепатит А», «свиной кириип», «дифтерия», «коревой краснуха» диэн сыстыганнаах, ыарахан ыарыылар тура сылдьыбыт кэмнэригэр биһиги улуус оҕону сүтэрбэтэхпит. Урукку оҕолору кытта тэҥнээн көрдөххө билиҥҥи оҕолор доруобуйалара чыҥха атын. Холобура, урут оҕолор үгүстэрэ таһырдьа сылдьаллара элбэх буолан доруобуйалара хатарыылаах этэ. Телевизор үйэтэ кэлиэҕиттэн оҕолор харахтара мөлтөөтө, таһырдьа сылдьаллара аҕыйаата диэн быраас киһи быһыытынан бэлиэтии көрөбүн”.
Мэлдьи үөрэ сылдьар, хас биирдии оҕоҕо ийэлии истиҥник сыһыаннаһар Валентина Петровна Иванованы оҕо консультациятыгар элбэх киһи өйдүүр.
Кини оҕо доруобуйатын харыстабылыгар 1976с. үлэлээбитэ. СӨ доруобуйатын харыстабылын туйгуна Валентина Петровна үлэлээбит сылларын бу курдук ахтар: “Билигин үлэлии сылдьар үгүс педиатр быраастары, медиктэри оҕо эрдэхтэринэ көрбүппүт, эмтээбиппит (Күлэр). Урут Сунтаар нэһилиэгэ 2 учаастакка арахсара. Ол иһин, үлэ олус элбэх этэ. Быраастар, сиэстирэлэр кыра саастаах оҕо ыарыйдаҕына дьиэлэригэр сатыы тиийэн оҕолору эмтииллэрэ, көрөллөрө-истэллэрэ. Тимир испириис туттарбыт саҕана, хас биирдии иҥнэни, испирииһи оргутарбыт. Бу үлэбитигэр олус эппиэтинэстээхтик сыһыаннаһарбыт Билигин санаатахха үлэбит олус ыарахан этэ. Ол да буоллар, хаһан даҕаны сылайдыбыт диэн үҥсэргээбэт этибит. Оҕо доруобуйатын инники күөҥҥэ тутарбыт”.
Оҕо доруобуйатын харыстабылыгар турар үрүҥ халааттаах аанньалларбыт үтүө соруктаах үлэлэрэ дьон махталын ыла турдун.
Мира АФАНАСЬЕВА