Бэс ыйа сайыҥҥы кэм саҕаланыыта. Бу ый саамай алгыстаах кэм. Онно түбэһиннэрэн биһиги сирдээҕи симэхтэрбит, ымыыларбыт — оҕолорбут бырааһынньыктара.
Быйылгы Арассыыйаҕа Дьиэ кэргэн, Өрөспүүбүлүкэбитигэр Оҕо саас, улууспутугар Аҕам саастаахтарга ытыктабыл сылларын чэрчилэринэн, Оҕо көмүскэлин күнүн Сунтаарбытыгар үрдүк таһымнаахтык бэлиэтээтибит.
«Алмаз» стадиоҥҥа сарсыардаттан оҕо аймах тоҕуоруһа муһунна. Үөрүү-көтүү, күлсүү-салсыы. Мэктиэтигэр Үрүҥ кыырай халлааммытыттан күммүт биһиги оҕолорбутун кытары тэҥҥэ үөрсэн, күлсэн, сылаас сардаҥаларын ыһыахтыы оонньоото, ону сэргэ дөрүн-дөрүн сиккиэр тыал оҕолордуун мэниктиирдии илгийэн ааһан, стадиоҥҥа мустубут оҕону, улаханы сөрүүкэттэ.
Бырааһынньыгы тэрийээччилэр стадиоҥҥа мустубут дьон олорор ыскамыайкаларын сөрүүн, хахха сиргэ туруортаабыттара биир эмиэ кырата суох болҕомто буолар.
Бырааһынньык киэркэммит кэлээскэлэрдээх кырачааннар, уһуйааннар иитиллээччилэрин, оскуола үөрэнээччилэрин парадтарыттан саҕаланна. Итиини итии, куйааһы куйаас диэбэккэ араас ойуулук дьоруойдарын мааскаларынан таҥныбыт үлэһиттэр иитиллээччилэрин кытары тэҥҥэ сэлэлии хааман киирэллэрин көрөн, «оо, кинилэр буолбатах киһи» диэн элбэх киһи саҥа аллайда.
Парад кэннэ улууспут баһылыга Анатолий Григорьев аатыттан грамоталары ситиһиилээх үөрэнээччилэргэ туттарыы буолла. Нэһилиэк баһылыга Эдуард Филиппов, үөрэҕирии салаатын начальнигын солбуйааччы Владимир Уаров истиҥ эҕэрдэлэрин эттилэр.
Уһуйааннар, үөрэх тэрилтэлэрэ, улуустааҕы аҕалар түмсүүлэрэ, Оҕо дьоҕурун сайыннарар уо.д.а. тэрийбит былаһааккаларыгар оҕолор мустаннар араас көрдөөх оонньууларга, күрэстэргэ кыттан минньигэс бириис тутан үөрүүлэрэ үксээтэ.
Ону сэргэ Оҕо дьоҕурун үлэһиттэрэ автобуһунан нэһилиэк бэлиэ миэстэлэринэн оҕолорго экскурсия тэрийдилэр. Улуус иториятыттан элбэҕи кэпсээтилэр.
Бырааһынньыктааҕы ырыа-тойук дьиэрэйдэ, оонньуу-көр өргө диэри барда.
Яина ВЛАСЬЕВА