Олунньу 16 күнүгэр Сунтаардааҕы «Ньургуһун» оҕо сайдар киинигэр методическай турнир буолла. Барыта 4 улуус күөн көрүстэ: Үөһээ Бүлүүттэн -«Ситим», Бүлүүттэн — «Күндү таас», Сунтаартан — «Росток», Ньурбаттан- «Сардаана» хамаандалара кыттыыны ыллылар. Метотур Сунтаар улууһугар бастакытын ыытылынна. Сүрүн сыала оскуола иннинээҕи үөрэхтээһин үлэтин таһымын үрдэтии уонна сайыннарыы буолар. Турнир биэс түһүмэхтэн турда, ол курдук: бэйэни билиһиннэрии (видеоролик нөҥүө), дьиэтээҕи үлэ быһыытынан «Форсайт-сессия», «Методическай кейс», «Х-фактор» бэриллибит проблемнай түгэннэри быһаарыы, «Аһаҕас микрофон».
Дьүүллүүр сүбэҕэ Сунтаардааҕы үөрэх салалтатын иитэр- үөрэтэр уонна эбии үөрэхтээһин отделын сэбиэдиссэйэ Александра Васильева, Сунтаардааҕы үөрэх салалтатын оскуола иннинээҕи отделын сүрүннүүр исписэлииһэ Урсууна Федорова, «Ньургуһун» оҕо сайдар киинин иитээччитэ Надежда Алексеева үлэлээтилэр.
Метотур түмүгүнэн Бүлүү улууһуттан — «Күндү таас» хамаандата кыайыылаах буолла. Кыайыылаахтары эҕэрдэлиибит, турнир кыттыылаахтарыгар махтанабыт.
Мария Владимирова,
«Ньургуһун» оҕо сайдар киинин сэбиэдиссэйи
иитэр-үөрэтэр үлэҕэ солбуйааччыта.