Сунтаар улууһугар анал байыаннай дьайыыга сылдьар хорсун санаалаах эр дьоммутугар, уолаттарбытыгар күүс-көмө, өйөбүл буолар араас хабааннаах, үгүс үлэ тиһигин быспакка ыытыллар.
Ол курдук, балаҕан ыйын 17 күнүгэр Элгээйи нэһилиэгэр улуус дьаһалтата көҕүлээһининэн 60-ча киһилээх, байыастар дьиэ кэргэттэригэр уонна аҕам саастаах дьоҥҥо анаан, 5 га сирдээх буолаҕа хортуоппуй хостооһунугар күүстээх субуотунньук тэрилиннэ. Манна улуус дьаһалтата, дьокутааттара, хонтуруоллуур уонна ааҕар-суоттуур палаата, үп-харчы хааһынатын, тутуу, тыа хаһаайыстыбата, үөрэҕирии, промышленность, экэниэмикэ, организационнай, спортивнай, ыччат отделлара, административнай хамыыһыйа, ЕДДС үлэһиттэрэ туора турбакка, көмө-тирэх буолаллара хайҕаллаах. Семен Попов хортуоппуй сиэмэтин саас Нам улууһуттан «Гала» суорду аҕалан ыспыт.
Анатолий Григорьев, улуус Аҕа баһылыга: «Улууспут дьокутаата Семен Попов анал байыаннай дьайыы кыттыылаахтарын дьиэ кэргэттэригэр уонна улууспутугар Аҕам саастаахтарга ытыктабыл сыла биллэриллибитинэн, ытык кырдьаҕастарбытыгар хортуоппуйунан көмө оҥорор этиитин ылынан, быһа гыммакка субуотунньук тэрийдибит. Түгэнинэн туһанан Семен Валерьевичка махталбытын тириэрдэбит. Бу курдук үтүө санаалаах киһини, саҥа саҕалааһыны атын да дьон холобур оҥостуохтара диэн баҕа санаалаахпыт.»
Борис Васильев, үөрэх салалтатын салайааччытын солбуйаачччыта: «Үөрэх салалтатыттан 12 үлэһит субуотунньукка таҕыстыбыт. Анал байыаннай дьайыы байыастарыгар үгэс курдук көмөбүтүн ситэрэбит. Маны таһынан үөрэх систиэмэтэ кинилэр дьиэ кэргэттэригэр, оҕолоругар атын эрэгийиэннэргэ да, бэйэбит өрөспүүбүлүкэбитигэр, улууспутугар да араас лааҕырдарга босхо путевканан, нэһилиэк иһигэр автобуска төлөбүрэ суох айан талонунан хааччыйабыт.»
Бу күн, салҕыы нэһилиэккэ Игорь Яковлев бааһынай хаһаайыстыбатыгар 1,5 га иэннээх хаппыыста буолатыгар күргүөмнээх көмө оҥоһулунна. Бу иннигэр хаппыыста бааһынатыгар Игорь Яковлев иккиэ буолан сылдьыбыт эбит буоллахтарына, бүгүн үөрүүтэ икки бүк үрдээтэ . Алтынньы ый 1 күнүгэр диэри хаппыыста барыта быһыллан бүтүөхтээх. Игорь Яковлев 2016 сылтан хаһаайыстыба тэринэн күн бүгүн Харыйалаах диэн сиргэ хортуоппуй уонна хаппыыста олордуутунан дьарыктанар. Хомуллубут хортуоппуйун дьиэтин тиэргэнигэр саҥа тутулла турар овощехранилищатыгар, оттон куулламмыт хаппыыстаны улахан тэпилииссэтигэр сааһылаан, атыыга таһаарыар диэри харайар эбит.
Дьэ, бу курдук 103 куул хортуоппуй, биир бырысыап хаппыыста куулланан, биир үлэ күнэ таһаарыылаахтык уонна туһалаахтык ааста.
Елизавета ТИТОВА