Ааспыт нэдиэлэ саҥатыгар улуустааҕы дьиэ кэргэн туруктаах олоҕун сэрэтэр отделение үлэһиттэрэ өрүс уҥуор сытар Түбэй-Дьаархан, Сиэйэ, Элгээйи нэһилиэктэригэр элбэх оҕолоох ыалларга сылдьан оҕо иитиитигэр болҕомтолоох уонна эппиэтинэстээх буолалларыгар ыҥырдылар. Хамыыһыйа састаабыгар отделение сэбиэдиссэйэ Альбина Прокопьева, социальнай педагог Анна Тимофеева, ПДН иниспиэктэрэ Сайыына Кириллина уонна улуустааҕы киин балыыһа нарколог бырааһа Светлана Новгородова бааллар. Бу сырыыга кинилэр саастарын ситэ илик оҕолордоох 5 дьиэ кэргэҥҥэ сырыттылар. Кинилэр олохторун-дьаһахтарын туһунан 4 аактаны толордулар. Онтон биир нэһилиэккэ түөрт оҕолоох ыалы эрдэттэн сэрэтэр үлэҕэ ыларга бэлиэтэннилэр. Ону таһынан социальнай хантараак туһунан кэпсээтилэр. Бу барыта «Об основах системы профилактики безнадзорности и правонарушений несовершеннолетних» 120 №-дээх ФЗ сөп түбэһиннэрэн ыытыллар сэрэтии үлэтэ буолар.
Маннык сэрэтии үлэтэ улуус бары 26 нэһилиэгэр ыытыллар. Хамыыһыйа чилиэннэрэ онно сылдьан ыалларга оҕо иитиитигэр бэсиэдэлэри оҥороллор эбит. Кыаммат олохтоох буоллахтарына, социальнай тэрилтэ буолалларынан, кинилэргэ көмөнү оҥорорго үлэлэһэллэр.
Гаврил АНДРЕЕВ.