Улуус нэһилиэктэрин икки ардыларыгар спартакиада ыытыллыбыта хаһыс да сыла. Манна улахан, орто, кыра нэһилиэктэр диэн арахсан күрэхтэһэллэр. Бэҕэһээ, Сунтаарга кииннээн, манежка гиирэ анньыытыгар үс бөлөҕүнэн күрэхтэһии буолла. Тэрээһин Саха сиригэр физкультурнай хамсааһын 100 сылын чэрчитинэн барда.
Нэһилиэктэр бу күрэхтэһиигэ баһылыктан саҕалаан ыччатыгар тиийэ күүскэ бэлэмнэнэн, дьарыктанан киирбиттэрэ көстөр. Ол курдук, Уһун Күөл, Хадан, Сиэйэ уонна Хоро нэһилиэктэрин баһылыктара бэйэлэрин хамаандаларын дьонун көҕүлээн, кыттыыны ылбыттара холобур буолар.
Күрэхтэһии сүрдээх тыҥааһыннаахтык барда. Кыттааччылар хас биирдии очкуоларын суоттаан-учуоттаан, кыраҕатык манастылар.
Күрэхтэһиигэ Афанасий Жараев судьуйалаата. Улуустааҕы гиирэ успуордун сүрүннүүр тириэньэринэн Афанасий Тимофеев саҥардыы үлэлээн эрэр. Кини бу күрэхтэһии туох да мөккүөрэ, балыйсыыта суох барарыгар Афанасий Терентьевичка көмөлөһөн, бэркэ ыыттылар.
Күрэхтэһии түмүгэ маннык буолла. Улахан нэһилиэктэргэ Тойбохой нэһилиэгин хамаандата бастаата. Иккис –Элгээйи, үһүс – Сиэйэ. Ортолорго Маар Күөл хамаандата туох да мөккүөрэ суох кыайыылаах буолла. Уһун күөллэр иккис, Түбэй-Дьаархан үһүс миэстэ буоллулар. Кыра нэһилиэктэргэ түбэйдэр бастаатылар. Илимниир, Күүкэй хамаандалара туһааннааҕынан иккис, үһүс буоллулар.
Кыайыылаахтар, призердар мэтээллэринэн, грамоталарынан, сыаналаах бириистэринэн бэлиэтэннилэр.
Манна даҕатан эттэххэ, дойду бэрэсидьиэнэ Владимир Путин «2030 сылга диэри успуордунан дьарыктанар нэһилиэнньэ ахсаанын 90 бырыһыаҥҥа тириэрдэр соруктаахпыт» диэн алтынньы ыйга Пермь куоракка «Спортивная держава» форумҥа этэн турар.
Онон успуорт биһиги олохпут нуормата буоларын ситиһэргэ үлэ ситимнээхтик барар. Биһиги улууспут дьаһалтата, успуорт салалтата успуорду, үлэни дьүөрэлии тутан, дьон доруобуйата тупсан, үйэтэ уһууругар маннык тэрээһиннэри ыытара кэрэхсэбиллээх. Бу кэлиҥҥи биэс сылга нэһилиэнньэ маассабай успуордунан дьарыктанара элбээтэ. Ону таһынан спортсменнарбыт араас таһымнаах күрэхтэһиилэргэ ситиһиилэрэ үгүс.
Яина ВЛАСЬЕВА