Атырдьах ыйын 12 күнүгэр — Наахараҕа суолталаах күн буолан ааста.
Дьоллоох Дьокуускай куораттан Саха Өрөспүүбүлүкэтигэр үлэлиир «Историческая память» федеральнай бырайыагы олоххо киллэрии чэрчитинэн, «Төрүт дойдум — сылаас тыына» тэрээһин буолан ааста. Ыалдьыттарбыт саха сиригэр биллэр-көстөр, туспа ааттаах-суоллаах дьон: «Историческая память» ФПП Саха сиринээҕи уопсастыбаннай Сүбэтин бэрэссэдээтэлэ, «Биир ньыгыл Арассыыйа» баартыйа Бэрэссэдээтэлэ Д.А. Медведев Саха сиринээҕи Уопсастыбаннай приемнайын салайааччытын солбуйааччыта Саргылаана Неустроева. Наахараттан төрүттээх.
«Историческая память» ФПП «Докумуон нэһилиэстибэтэ» хайысхатын салайааччыта, СӨ Национальнай архыыбын дириэктэрин солбуйааччыта Наталья Малышева.
«Историческая память» ФПП «Өксөкүлээх Өлөксөй духуобунай нэһилиэстибэтэ» хайысхатын салайааччыта, А.Е.Кулаковскай-Өксөкүлээх Өлөксөй сиэнэ Лариса Кулаковская.
Ону тэҥэ Сунтаар улууһун баһылыгын социальнай уонна имиджевэй бэлиитикэҕэ солбуйааччы Гаврил Еремеев, Сунтаар култууратын уонна айылгытын салалтатын салайааччыта Саргылана Омукова уонна Сунтаар улууһун архыыбын салайааччы Аркадий Яковлев буолан кэллилэр.
Ыалдьыттарбытын көрсүү сиэрин-туомун толорон, кымыстаах, алаадьынан айах тутан, түптэ буруотун сытын унаарытан көрүстүбүт. Ол кэннэ Наталия Николаевна төрүт сириттэн Ыарҕа күөлүн түбэтиттэн, Дьөгүөрүмэ өтөҕүттэн сырыыбыт саҕаланна. Ол курдук Наахарабыт ытык сирдэрин Күөл Баһа, Микиисэ уус балаҕана, алгыс түһэр ыһыахтыыр сиргэ, хайаҕа тахсан сир хараҕын көрөн ыалдьыттарбыт олус сэҥээрдилэр, айылҕабыт кэрэтиттэн, дириҥ ис хоһоонноох дойдутун биллилэр-көрдүлэр. Ол кэннэ кулуупка Наахарабыт нэһилиэгин олохтоохторун кытта көрсүһүү, ирэ-хоро истиҥ дьикти алыптаах кэпсэтиһии буолла. Киһи сөҕүөх, Мэҥэ-Хаҥалас Наахаратыттан уонна Амма Наахаратыттан эмискэ ыалдьыттар кэлэннэр, тэрээһиммитин тупсардылар. Бүлүүчээн нэһилиэгиттэн Наахараттан төрүттээх аймахтарбыт кэлэн, тэрээһиммитин өссө киэргэттилэр. Барыта үөһэттэн ыйыллан турар диэбиттэрин курдук, орун-оннугар табыллан, элбэх кэпсэтиһии таҕыста, инники үлэлэри былааннаатылар. Өксөкүлээх Өлөксөй сиэнэ Лариса Кулаковская илэ бэйэтинэн кэлэн төрүт Наахарабыт сиригэр-уотугар үктэммитэ хас биирдии олохтооххо сүдү бэлэх буолар. Онон дьэ, Наахарам дьоно-сэргэтэ, Наахараттан төрүттээх көрсүө-сэмэй дьоммут өрүү: Түмсүөҕүҥ! Үүнүөҕүҥ! Сайдыаҕыҥ! Биһиги, наахаралар диир курдук үлэлиэҕиҥ!!!
Саргылана ГЕНЕРОВА.