Дойдубут Бэрэсидьиэнэ Владимир Путин тус хонтуруолугар турар «Доруобуйа» национальнай бырайыак чэрчитинэн медицинскэй оборудованиенан толору хааччыллыылаах «Камаз» массыына биһиги улууспут киин балыыһатыгар баар. Мобильнай биригээдэ үлэһиттэрэ бу массыынанан улуус нэһилиэктэригэр сылдьан дьон доруобуйатын көрөллөр-истэллэр, сүбэ биэрэллэр.
Ол курдук, алтынньы 25 күнүгэр, Кириэстээх нэһилиэгэр, сиэстэрэ Мотрена Сидорова, акушерка Наталья Намылова уонна суоппар Иван Сусов састааптаах мобильнай биригээдэ үлэлээтэ.
Манна оскуола үлэһиттэригэр уопсай хаан, биохимия анаалыстара эрдэ оҥоһуллубут буолан, ВИЧ анаалыһын 40 киһи биэрдэ, акушеркаҕа 33 дьахтар көрдөрдө.
Уопсайа, сыл саҕаланыаҕыттан мобильнай биригээдэҕэ 1919 киһи көрдөрдө.
Салгыы, сэтинньи 1 күнүгэр Уһун Күөлгэ, сэтинньи 2 күнүгэр Илимнииргэ тахсыы былааннанар.
Айаны-сырыыны тулуйбат дьоҥҥо бу маннык биригээдэ тахсан үлэлиирэ олус наадалааҕын олохтоохтор бэлиэтииллэр уонна балыыһа үлэһиттэригэр махталларын тиэрдэллэр.
Сунтаардааҕы киин балыыһа ыарыыны сэрэтэр кэбиниэтэ